February 12, 2012

Beethugs post 'This is My First Love Letter' hian lunghlui a tilêng riau mai a, tlém të ka'n ziak ve mai mai teh ang.

Ka hmangaih lehkhathawn dawn hmasak ber chu 2004 kha a ni âwm e. Lo dahṭhatna châng ka hre lem lo va, a pawi tak tak a ni. Chu'ng lai chuan (ti ve khanglang ila!) mobile handset hi kan la nei ve lo va, hmun danga mi kan biak pawhin mi landline hi man chawiin kan hmang mai ṭhin a. Ngaihzawng biak nan erawh a tihchi lem loh; mi ina phone hmang kan nih avangin sawi duh tak kan sawi ngam ngai lo va.


Kum 2003 kumah khan Suangpuilawn-ah Naupang Inkhawmpui-ah kan kal a, ṭhiante nen kan thlengho va. Chuta kan thlenin nula, Helen-i nen chuan mitmei kan inhmuh ta zeuh zeuh va. A zeia zei lo ta ngang chu, engmah bawhzui awm lem lovin kan haw leh chu a ni mai a. Chutih lai chuan ngaihzawng ka la nei ngai lo va, a rûka taka duh deuh mai chu ka nei ve tho va. Chu a rûk taka ka duh em em chuan tunah pasal a nei daih tawh lehnghal a! Fa pawh a nei tawh a ni awm e.

Tichuan le.. Kum 2005 khan Durtlang-ah ka awm a, Naupang Inkhawmpui velah chuan ka kal thei ta lo va. Ka ṭhiante erawh an kal a, a hmasa lama kan thlenhonaah bawk khan an lo thleng a. Krismas vela kan khuaa ka haw chu ka ṭhianpa pakhat (a hming dah ve reng reng teh ang — Lawma) hian, "In ṭhianpa kha a rawn kal ve nange?' tiin mi zâwt a, Aizawl-a i awm thuin ka lo chhâng a.." tiin min hrilh a. Chuta ṭang chuan min haw lo takzet a nih ka ring ta a. Tichuan, ka theih anga mawihnai leh khabe tâwkin a lehkha tur chu ka ziak ta rãwih a. Mi kal tur remchâng ka pe ta a.

Mi rawn chhâng ta ngei mai! Ka beisei ang chiahin min lo duh ve hi a lo ni a, ka ngaihzawng neih hmasak berna a ni bawk a, ka phûr kher mai! Chuta ṭang chuan lehkha kan inthawn tawn ta reng a; chhûngte lah chuan engtin tin emaw an lo hria a. Ka nau lah chuan chawei laia mi chhaih a chîng a, ka pa, pa phawk ve angreng tak chuan a ṭhiante bulah 'Helen-i kan monu hual' tih lam hawi zâwngin a lo sawi reng bawk si! A hria apiangin mi chhaih nan tak an hmang a, a nuam ru veng veng lawi sia!

Lehkhathawn ringawt chu kan duhtawk ta lo. Hmána Naupang Inkhawmpui-a kan inhmuh bâk kha kan la inhmu leh ta lo hrim hrim a. Ka ṭhianpa Lawma nen bawk chuan kan inthurual a, Pathianni tûk khat chu zingkar hma deuhvah ka tho va, Suangpuilawn lamah kan phei ta vang vang a. An ṭhenawmte inah tukṭhuan kan ei a. Nilêngin kan awmchilh hi a ni ringawt mai a; a chhûngte an awm bawk nen, zei loh bawk nen — bialnu hmasa berte bula ṭhut boruak, nuam veng veng bâk thil dang a awm lem lo.

Tlaiah haw turin kan intintuah a. Min lo thlah vang vang a, an khaw dai hla deuh thlengin a rawn kal a. A kir leh tur chu ka ṭhianpa chuan chance min pe a, kawngpui bulah hian kan ṭhu a, thlang lam kan hawi a — sawi tur a va han vâng chiang tak! Ngawi vang vang a, ṭawng chhuak leh hlawl a. Ka ṭawng loh chuan ṭawng a tum bîk der si lo. Ka khûr der der reng mai bawk si; ka awmdan kha a laklawh ngei mai.

A tâwp a tâwpah chuan haw tak tak zai ka rêl ta a. Ka'n tho va, ka'n pawm chawt-ah! Chuan...chuan...chuan.. A vawikhatna atan, tlang taka sawi chuan ka fâwp ta vawng vawng a. Chil a van tam duh tak! Kan inthlah hnuin ka chhâk tlãwrh! Haw kawngah ka ṭhianpa hnenah ka sawi chhâwng a, ramhnuaiah kan nui dun uar uar a, kan hlimpui ta phian a.

Chumi hnuah pawh lehkhathawn hmangin kan inum zui reng a, an khuaa ka zin khan thlalak lo inpêk nachang kan lo hre reng reng lo mai a. Kan lo inthlahlel ve tawh bawk si a, thlalak inthawn dan kan ngaihtuah ta a. Kei chuan ka lanṭhatna ber ni-a ka hriat, Durtlang-a ka awmnate in chunga ka lâk chu ka thawn a; ani pawh chuan Ramhlun Sports Complex-a a lâk ngei mai chu mi rawn thawn ve bawk a; mut dawnah te khan ka van en nasa thei tak! A thlalak mi rawn thawnna kalkawngah chuan alawm, thil zahthlâk lutuk tak mai ka tawn ni.

Suangpuilawn leh kan khua hi a inhnaih hle a, km 10 vel chauhvin a inhlat âwm e. A inkarah Lamherh khua a awm bawk a. Intlawhpawh tawn reng kan ni a, ani pawh chuan a thlalak chu lehkhathawn karah zepin mi kal remchâng a rawn thawn a, chu'ngho chuan mi dawr remchang laiah an lo dah tawp a.

Ka address a lo ziak chiang vak lo chu (k)an buaina a ni ta! 'Tsa, Vanbawng' tih ringawtin mi rawn address a, chutih lai chuan tuman 'Tsa' hriatin min hre mang bawk si lo. Thlalak/lehkhathawn dawngtute chu 'Tsa, Vanbawng' zawngin an buai ta a! Lehkhathawnte kha an hawng a, an lo chhiar a; thlalak te kha an lo en a! Keimah ka ni tih an hriatchhuah hnuin khawlaiah te mi chhaih nan tak an hmang a, an sawi luai luai a — A va han zahthlak chem chem tak em!

Ka lehkhathawn tur a ni tih ka hriat veleh ka ṭhianpa Lawma nen chuan la turin kan chhuak a. Ka zah êm avangin Lawma chu ka laktir nghe nghe a! A lâk hnu chuan hawn pawh la hawng phal lovin ramhnuaiah thingtuai pu pah turin kan chhuak a, lehkhathawn ka ak ràn bawk a. Ramhnuai kan thlen veleh chuan ka ṭhianpa nen kan hawng ta a!

A thlalak a lo tel a, kan en kan en a, a thu kan chhiar bawk a, hlim zetin kan nui hak hak a. A thuziak lah chu a lo thlum (tui) em em mai bawk si a; mahse, a thu a thlum poh leh a zahthlak ting mai bawk si! Ka lâwm bawk si, ka zak bawk si; a nuam bawk si, hrehawm bawk si hi a ni ringawt. Ka khi deuh reng mai a, ka sen deuh ṭáwn reng mai bawk a. A van nuamin a van nuam lo tak e aw..! Chu a thlalak min pêk chuan tun thleng hian ka photo album a la luah reng.

Ka ṭhianpa Lawma pawh a zirna lamah a pass ve zel a. um khat chu a pass lawm nan Helen-i'n ka hmingin dekchi të, thingpui lumna tâwk lek hi an zawrh lai a rawn thawn a, a duh ang ngeiin keimah ngeiin ka'n hlân-ah! Aizawl lamah Lawma nen chuan reilote chhûngin in kan inluahṭawm a, chutah chuan a dekchi të chu a chhawm zel a. Keimaha ka tlatfal hnuin keiman ka chhawm ve leh a. Hei, tûn thleng hian thingpui lum nan tak kan la hman reng hi! He thu hi ziak lo ila chuan ka dekchi të kawl hi Helen-i thilpek a ni tih ka hre tawh kher lovang; a va zia lo reuh.

Kei chu Aizawl lamah zirna chhunzawm turin ka chhuk leh ta a. Kum hnih vel zên zâwn kan inngaizâwng hman âwm e. Kan inṭhen hun tak kha ka chiang ta lo va, kum 2006 kum tir lam kha ni tain ka hria. Pawl 10 zir turin Aizawl lam ka pan leh dawn a. Zirna lama insawrbing ka duh chhuanlamin ṭhenna biahthu ka'n thawn mai a nih kha! Nâ a van ti ngawih ngawih tak. Tun hnu thleng hian ka la inthiam lo nia.

Ka ngaihzawng hmasa ber a nia, ka first love a ni hran lo. Keimahah a tla-na vak tawh lo hrim hrim a (hehe), ngaihzawng dang ka nei pawh a ni chuang lo. Ka ṭhen ve tawp mai 'ni. A hnuah a ṭhiannu min hrilh danin, ani pawh chu Aizawl lama awm turin a chhukthla ve a, a chhukthla hma chuan rilru nat vangin a ṭhiannu hmaah a mittui a tla zawih zawih a ni âwm e. A first love ka ni a niang!

Helen-i kha ka ngaihzâwng hmasa ber, ka hmeichhe fawh hmasak ber, ka love letter thawn hmasak ber, ka khaw dang ngaihzâwng neih hmasak ber a ni a, a hlu ve khawpin ka hria. Mahse, ka rilru erawh a luah zui em em hran lo va; ka inthiam lo deuh roh. Tunah chuan pasal a nei tawh an ti a, ka lawmpui khawp mai. Fanau maltluan chawia hlim leh lâwm taka an khawsak chhoh zel ka duhsak meuh meuh a ni.╩
Categories:

37 comments:

  1. A ngaihnawm hle mai, hmangaihna tawp theilo leh Dekchi bel chhe theilo i chhawm chho zel nen...he he he..

    ReplyDelete
  2. @chhangte_II: Haha.. Nia mawle.. Ka'n luangliam ve duah a, eng eng emaw ziah tur kha chu, han ziah tak phawngah chuan a lo awm ve zel a..haha. Ka lawm lutuk e. Dekchi pawh hi nawtfai nghe nghe ila a tha ang.

    ReplyDelete
  3. This comment has been removed by the author.

    ReplyDelete
  4. Ngaihnawm hle mai...Dekchi bel chhe thei lo ang chu kei pawh Dekchi nilo, 'Nawhlung' ka neive sin... hlu ve raps....

    ReplyDelete
  5. @Hlua: Nawhlung a ni?! Nawhlung ai chuan Dekchi a hlu feee..haha. I rawn leng a, ka lawm e.

    ReplyDelete
  6. A ngaihnawm hle mai. Ka lo zin hunah chan i dekchi te ngei hmanga i thingpui lum ka in ngei ka inbeisei. Heleni chuan a hmangaih hle awm si che a, engkhaw sawi set set lova i then ngawt mai chuan a thinlung i hliam nasa ve ngawtin ka ring.

    A bul tanna pawh khi a la rei lo hle mai aaaa....

    ReplyDelete
  7. Pu Caribou: Nia, nuam ka ti chiah lo. Mahse, Khuanu ruat loh hi chu inthen hun a lo awm nge nge thin a nih hi. Ni e, i rawn zin hunah chuan dekchi të ngeiin thingpui ka lo lum ang che. Camera nei ila chu ka rawn dah tel tur a nia.

    ReplyDelete
  8. Hmangaih hmasa ber leh lehkhathawn hmasa ber a lar riau mai ka ti.
    Ka hmangaih hnuhnung ber leh lehkhathawn hnuhnung ber ka ziak ve nang a :D
    A ngaihnawm khawp mai thianpa. Thil tawn maksak leh ngaihnawm pui pui hi in ngah bik mang e.

    ReplyDelete
  9. Haha.. Han ziak tak teh. Chhiar a châkawm viau a nia. Kei, lehkhathawn hi pakhatmah ka lo dahtha lo va, a pawi khawp mai.

    ReplyDelete
  10. A hrim hrimin Aizawla kal dawn vang khera han 'break' deuh kher! Hmeltha Nunrawng an phuah chhan hi i ni lo maw? :-) Nge, Aizawl lamah hmelthar chhar beiseiin i kal? A la hriatchhuah ve reng thin dawn che chu.

    ReplyDelete
  11. Hahaha.. Aizawl kal dawn vang pawh a ni lo!! Khami hnua ka bialnu neih hmasak ber chu 2009-ah daih ania aw..! Nia, min hrechhuak ve ngei ngei ang, mi duh em mai..lol!

    ReplyDelete
  12. a rilru chu a na ve ngawt ang cutia reason om lo a ban top te cu...a ngaihnom khp mai

    ReplyDelete
  13. @Alvina, nia...a âtthlâk khawp mai. Ka inthiamlo viau. Mahse, a hun lai ang zel kha a ni ve a, chutiang em em chuan ka nunrawng bik lo a nia...he2. Tunah chuan kei aiin a hlim tawh zawkin ka ring. Ka blog tehlul i rawn tlawh avangin ka lawm e.

    ReplyDelete
  14. Ava ngaihnawm tak em...ka lung atileng hle mai...I ziakthiam bawk si, hmanlai minti ngai takzet a ni.

    ReplyDelete
  15. Ka nui ker ker mai, kan vanglai min ti hrechhuak e..:) Ngaihzawng neih hmasak ber kha chu a nuam ania, thiante bulah hian kan sawi deuh chhen zel a. A hriat pawh hi kan hre rei duh ania. Nang pawh hian hetia i ziah dan ah i rilru ah engemaw ti deuh takin a la awm tihna..:)

    ReplyDelete
  16. @marvin: Tu pawh hian ngaih tur hi chu kan nei vek mawle. Hmangaihna la-na lo tak tak mihring lah va awm suh! Hmanlai i ngaih chu han phawrh ve teh khai.

    @Sangpuiipa: Hehe. Kei chu Beethugs post vang mai maiin ania ka hriatchhuah ni. Han ziak ve teh, a ngaihnawm zekin ka ring nia. :)

    ReplyDelete
  17. Thianpa zet hi chu aw...sawi tur eng2 emaw hi i lo ngah teh zawng a ni e. Ngawi teh! A thu pum bakah chu dekchite chu ka like bik e aw. Hre miah lovin a thingpui hmuam so ka lo in fo tawh si a.. A ngaihnawm khawp mai.

    ReplyDelete
  18. @Bawiha: Ni reng e mawle..! MALO thian zingah a in chu in awm nual tawh ang! Hahaha.. Ka lawm e.

    ReplyDelete
  19. I lekhathawn han tarlang thei nghal la ṭha tur mawle....

    ReplyDelete
  20. Nia tiraw.. Mahse, ka lo kawl tawh tlat lo va, a pawi khawp mai.

    ReplyDelete
  21. I duh deuhin rin loh deuha a ban thut che anih chuan Heleni tuar dan tur hi i hrechhuak ngei ngei ang!..

    Mahse i sawi angin Khuanu ruat loh hi a awm ve tlat si alawm tiraw?. Ngaihnawm em em e..

    ReplyDelete
  22. I love letter dawn chu a nawm dan avan dangdai dawn vele hairehai. :)

    Ka chhiar tui hle mai :)

    ReplyDelete
  23. @Pi Ma-i, Nia, ka hrethiam khawp mai! Mahse, tunah te chuan a dam tawh ang chu...hehe.. Ka lawm lutuk e.

    @Pu Hva, nuam dangdai tak a ni. Mahse, a hun lai hi a awm ve lutuk a..haha. Ka lawm lutuk e.

    ReplyDelete
  24. "Bialnu hmasa berte bula ṭhut boruak, nuam veng veng bâk thil dang a awm lem lo."

    He lai sentence te hi kan quote lawk. I sawi mawi tawi thiam khawp mai. :D

    ReplyDelete
  25. Haha! Ngaihnawm hranpa hle mai. Kei pawh, lehkhathawn ka dawn hmasak ber chu ka duh vak loh hnen atangin a ni a. Ka thawn hmasak ber erawh chu tun thlenga ka theihnghilh theih tak loh a ni.. mahse, sawi ve dawn lo rengsss.. :P

    ReplyDelete
  26. @Khabezuma: Hehe.. A ni viau tak tak asin! :) Ka lawm e.

    @Pu Zaia: Han ziak ngei ngei teh. Nang phei chuan i ziak ngaihnawm thiam dawn ropui si!

    ReplyDelete
  27. A ngaihnawm chiang e. Naupang te te hian in thil tawn hi in ziak a, a tha thei phian lehnghal a..haha. Lehkhathawn kha a lo hlu ngawt mai. Kei chu pakhatmah han sawi chhawn tur chat chuan ka hre tawh pek lo.

    ReplyDelete
  28. Hehehe.. Sheldon, blog te hi han nei la, i thil tawn te han ziak chhuak ve tak teh a.. Ngaihnawm tak tak a tam dawn ropui mai si a..

    ReplyDelete
  29. Dekchi te chu a hit khawp mai. Heleni te chu an khua ah chuan sumdawng lian ve pawl tak an ni maw? Naupang te Sunday nilenga in han in rim vel tur chu ka ngaihtuahin ka nuih a zaaaaaaaa mahse a ngaihnawm reuh. Next post ah chuan i first love chanchin chhiar tumin lo in ready teh ang.

    ReplyDelete
  30. Hahaha.. Miss Aduh, first love nen hian kan inngaizawng lo va, chanchin alawi pawh kan nei lo! Haha..

    ReplyDelete
  31. "bialnu hmasa berte bula ṭhut boruak, nuam veng veng bâk thil dang a awm lem lo" ka hrethiam :).. thu i sawi ngaihnawm thiam bakah i ngam bawk a, a ngaihnawm hle mai. Thil tam tak khi ka hrethiam..hihihi..nuam e lung a leng ;)

    ReplyDelete
  32. Hahaha.. Beethugs, thil tam tak khi a taka i tawn hnu a ni tih ka hre thei nghal. I thuziakin a hrin a nih khi. Ka lawm lutuk e.

    ReplyDelete
  33. Kumin chu hmangaihna kung pâr kum a ni hial lo maw? Hawina lam apiangah an luangliam thluah thluah mai. A ngaihnawm khawp mai. Mi erawh ka la bân ve lo, min bân tawh; Hmangaih lehkha ka la dawng lo, pakhat erawh ka thawn ve tawh; Card pakhat, Christmas card chhunga thu tawite inziak ka dawng ve tawh, tun thlengin a thawntu ka la hrechhuak lo. Ka hriatchhuah ve leh ka la ziak ve ang entawn tur a tha bawk a :P

    ReplyDelete
  34. Haha.. Sir VaiVa, hun a chawhnu tawh a, ziah tur awm ang ang ziah thuai thuai a hun tawh alawm. :-) Nang pawh han ziak la, ka chhiar châk teh a nia...hehe.

    ReplyDelete
  35. Til then lohna lam a nia :P Tin, sêlna lawk.... I post i publish hma in han justify zauh thin teh khai. Heti chuan tlar tin a in lawr hleih thluah mai. En a nuamin chhiar a chakawm leh zualin ka ring.

    I tan,
    VaiVa

    ReplyDelete
  36. Hehe.. Next-ah ka lo ti chhin ang e. Thanks!

    ReplyDelete
  37. I ziak niap niap a, ka chhiar zo ve mai. like e.

    ReplyDelete

Eng nge i ngaihdân?

Subscribe to RSS Feed Follow me on Twitter!