07 September 2011

Chhêmdam Thlifîm kum khat!

Mi blog-te chu kum sawm dawnte an ni tawh hlawm a, chutih laia keia blog kum khatna lo hetih pui hluai chu ka inthlahrung deuh va, mi nuihzat kan chang ang tih pawh ka hlau khawp mai. Amaherawhchu, ṭul ve tlata ka hriat vang leh, comment-tu leh chhiartute chunga ka lawmthu sawina ni pah fawmin ka han ti ve a ni.

Chhemdam Thlifim September ni 8, 2010 khan ka siam a. A hmain Chhemdam tih hming puin ka lo siam tawh a, thiam leh thiam lova dai chawp takmeuhva ka siam a nih avangin a template vel ka tibuai ta nuai a, a hran ka siam a, chhiartute zarah kum khat a tling ve ta reng mai a nih hi!

Hei hi chhiartute vang liau liau a ni tih ka hrechiang em em a, a bikin comment-tute in chungah ka lawm e. Nangmahni avang liau liauvin he blog hi a kal zel a ni tih ka hria a, thu lama ka pachhiat deuh chang pawha ṭhahnemngai taka Chhemdam Thlifim lo nghaktu in ni a, nangmahni avangin phurna leh chona ka neih phah zel a, in chunga ka lawmna hi a theuneu lo ve!



He thuziakah hian a hming hmerhin mi pakhatah chiah lawmthu ka sawi dawn; Sandman hian blog update hi ṭhahnemngai takin misual.com lamah  mi phochhuahsak ṭhin a, hemi avang hian zau zawkin mite’n he blog hi an lo hriat phah a, lut duh tan pawh awlsam takin a luh theih phah bawk a, a chungah ka va lawm tehlul em!

He blog hi mi chi hrang hrang 80 (Anonymous tiam lovin)-in an comment tawh a, post 52 (he post tiam lovin) awm tawhin comment zawng zawng hi (keima comment tiamin) he thu buatsaih lai thleng hian 737 a awm tawh a ni.

Blog-a comment tam zual 10-te hming leh an comment zat chu hei le!

Top ten commenters
1. Caribou - 64
2. H. Vangchhia - 44
3. Triplestar - 38
4. Rp Pachuau - 30
5. Khumchikthei - 20
6. Dolerich/Lalzarzova - 19
7. Sekibuhchhuak - 16
8. Noddy - 14
9. Krista Roluahpuia - 13
10. CyberThug - 12
Post hmasa ber - Rawih maia! September ni 8, 2010.
Comment hmasa bertu - Caribou, October ni 24, 2010 (Thlûkna dah dân leh short key pawimawh dang te)
Comment tamna ber post - Mizo blog khawvel leh Min tilungngaitu

He kum khat tlinna pual hian top 5 commenters remchâng ang angte chu hemi chungchanga an duh duh sawi turin ka ṭahawh a, min tihhlawhtlinsak hlawm a, ka lawm khawp mai.

Caribou...
"Chhemdam Thlifim blog-a thuziak ṭha tak tak ka chhiar te'n a changin min tinui a, a changin min tilungleng a, a changin min tibengvar hle ṭhin. Blog siam hi kan tam ang huin tha taka update zat zat peih erawh kan tlem hle. Chutih karah, bahlah awm hlek lova thuziak chhiar tur tharlam leh tha tak tak min rawn chhawpchhuak reng theitu TSa hi fak loh pawh tum ila fak loh a har a nih hi. Blog siam hi thil harsa a ni lo, a chhunga thuziak ṭha tak tak hmanga update ṭhin erawh thil dang daih a ni; a harsatzia ka hrechiang khawp mai. Blog pakhat lek pawh enkawl harsa tia ka iak ka iak laiin blog pahnih lai mai ṭha taka a enkawl thei te hlei hlei hi a chhuanawm ka ti. A thuziak reng reng ngaihnawm ti takin ka chhiar chhuak dap hin. Thil hmuh inang heuh heuh, thil tawn inang heuh heuh, kan sawi chhuah dante, kan ziak chhuah thiam dan te hi a lo va inang lo tak em! Hetih kawngah tak hian alawm he nau hi ka tluk loh em em hin. Ka ziak chhuah thiam miah loh tur ha tak takin a rawn ziak chhuak fo hin si a. 
A kum a la naupang na a, thuziak lamah erawh a naupang lo hle, a nihna a ropui lo na a, thu leh hla khawvelah erawh ka chunga leng a ni si. Thu leh hla lama thangchhuah diar lo khim tawhte ho sulhnu aiin a sulhnu te hian mawi loh bikna reng reng an nei hauh lo a ni tih hi huai takin ka sawi ngam e. Hetiang blog ha tak, a thlawna chhiar theih tura a rawn duang chhuak hi a lawmawm ka ti a, chawlhsan mai lova ha taka a enkawl chhoh zel theih nan leh, he Chemdam Thlifim hi chawl mai lova a thawt heuh heuh reng theih nan ka duhsakna sang ber ka hlan e."

H. Vangchhia...
"He blog pawh kum a tling ta der mai. Chhiartu bakah chhiartute'n an chhiar aṭangin midang chhiar lo thlengin a chhunga thu awmte hi Mizo mipuite'n ṭha lama hlawk nan hmang thei turin ka duh hle mai. Kum dang tam tak ziah chhunzawm zel ni thei sela a lawmawm ngawt ang."

Triplestar...

“Hun rei lo te emaw tih chhungin Chhemdam Thlifim blog chuan kum khat a lo tling ta der mai. Ka lawmpui e.

He blog hi Zoram khawvel blog-ah chuan ka luh ngunna ber pawl zinga mi a ni a, comment pek theih loh changte awm mah se, ka chhiar hram hram ṭhin a, internet luh chang hian ‘A blog a update leh tawh ang em aw..’ tiin nghakhlel takin ka tlawh hram ṭhin.

He blog-ah hian fiamthu nuihzatthlak tak tak leh thuril tak tak chhiar tur a awm ṭhin a, keini’n kan kal pelh leh kan kan mai mai ṭhin kha ani chuan chik taka enin thu ril leh hlu tak tak a lo chhar chhuak ṭhin a ni.

A blog neitupa hi kum lamah keini ai chuan a nau a ni tih ka hria, mahse, thu leh hla lamah chuan ka pa rual a ni tih ka pha lo ve. Ani hnen aṭang hian thil tam tak ka zirin ka hriat belh a ni.

He blog hi kum khat mai ni lo, kum sawm tam tak tluang taka kal zel tur leh Zofate tan, thu leh hla lamah leh fiamthu thianghlim lama Zofate chawmtu ni zel turin duhsakna sang ber ka hlan e."

Rpa Pachuau...

"TS-a hi ka la hmu lo va, internet khawvelah erawh chuan ka ṭhian ṭha berte zinga mi a ni hial awm e. Blog ka siam ve achinah ka luh ṭhinna ber a ni a, luh man a awm ka ti ṭhin hle a ni. Thu hi a naupan aiin a thiam a, a kum aiin a ril hian ka hre ṭhin. Fiamthu duh tak a nih ka ring a, a post zauh zauh bawk ṭhin a, ka hlimpui hle ṭhin. Thu-a duhtawka a han thlep kual vel ka chhiar hian mi pahnih ka hrechhuak ziah bawk. A blog-in kum khat a tling hi ka lawmpui rualin ka tluk lo ka tihna chu post update chungchangah hian a ni – tluk rual a ni lo. Taimak a ngai em a, ka pachhiatna lam tak a ni bawk si. Ka blog aiin thla hnih khat chauhvin a upa a, thu pai lamah erawh a pa rual a ni hawt ang. Mi pakhat, ṭhalai, fel tak, tuina lama chiang tak mai ka hmelhriat a, a blog chhim theia ka awm hi ka lawm hle a ni – ‘Chhemdam Thlifim’ dam reng se la, min chawmtu ni zel rawh se."

Dolerich...
"Internet khawvel hi ka tan chuan chenna ngai loh ram fan ang a ni a! Chu ramah chuan lungawina te, hlimna te, lawmna te ka rin loh tak takin ka hmu a. Chu'ng zingah chuan he ka nau anga ka en, Tsa Khupchong blog hian ṭahna zara nuihna awmchhun chu duhsak takin min hlan ṭhin a. Thu leh hla mualah thang chhuah a, tlang tlir turin ka beisei a. Ka duhsakna zawng zawng ka hlan e."

Chhemdam Thlifim tleh heuh heuh rawh se! 

01 September 2011

Ka Nu

Mangang leh lungngai tâwpa ka awma min thlamuantu, chanchhe ber leh khawvêl êng kîl ngam lo tur khawpa zahna nasa ka tawh chânga ka bula awma, hmangaih tlâk loh khawpa inngaihna rilru pu hial khawpa suala ka tlûk chânga min theihnghilh lotu, ka nu hi chu a hlu a ni.

Mite anga khawilo kal dâwna chêng tam min hûm chhuahtîr thei ni mah suh se, a hmangaihna
awngkam kha a hlu a, suma lei theih a ni lo. Nu sàr veh vawh leh duh duh thawka ti thei ni lo mah se, amaha beiseina leh rinna awm chuan a tichak a, chu chu a a faten paw'n kan lo chhim hîn.

Thiamna lamah chhuan tur engmah nei lo mah se, a thilthlâwnpêk zozai kha tu nu dang mahin min pe thei lo va, min hmangaih anga tu dang mah a hmangaih thei lo hi vânnei ka intihna ber a ni.


Eng emaw chângin thinrimin han titau ve
hîn mah ila, nêm leh zaidam takin min thawidam a tum hîn a; a bulah chuan vânduaina lo thlengte pawh hi a nuam bîk hliah hliah a, mal taka ka awm a phal ngai lo.

Khawvêl sualna tam tak leh hmêl hrang hranga inlana mi bum tum
hîntu laka ka fihlîm theih nan a theih chin chinah a âng chhûng nuamah min chêntîr a, ka tawrh ai pawhin a tuar mai hîn. Chu a hnathawh ropui tak chu a hlawhchham hauh lo va. A hlawhtlinna chu keiman ka têl mêk a ni.

Ka thiltihah hlawhchhama ka awm chângin kei ai mahin hrehawm a lo ti
hîn a, ka rilru ai mahin a rilru a lo na hîn. Chu'ngte avângin a bulah chuan naupang thar ta sawtin ka inhre hîn a, chuta ang chuan a hlutzia chu ka hre chhuak uai uai a. Ka chhût a, ka chhût nawn leh hîn a, ka hlawhchham a ni; tunge nu hmangaihna hlutzia chhût chhuak zo ang le?

Taimâkna leh tumruhnain min kaihruai a, chhelna leh dawhtheihnain min enkawl seilian bawk a. Ka awm dân tura
ha tam tak min hrilh mah se, a chêtdân leh awmdânin thil tam tak min zirtîr zâwk a, amaha pârmawi chu keimahni-ah a lanchhuahtîr hîn. Chu chuan puitlinga ka kalna kawng a kawhhmuh a, ka inchhuihbah palhna lak atà min vêng tlat a ni.

Ka damlo va, a tlaivâr a; lungngai leh khawhar ngawih ngawiha ka awmin min thlamuan
hîn. Thinlung ngui leh chauva ka awmin min kuangkuah hîn a, ka ahna mittui chu duat takin a hruhul hîn. Sual kawng ka zawh a phal ngai lo va, a tih theih tâwk awngaina hmangin min hnèm hîn. Hmangaih tâwp lovin min kuangkuah a, chutah chuan thlamuang takin ka ap hîn. Nu leh fa inkâra hmangaihna tluanghrui awm hi tu'n chhuchat zo tak maw aw..!

Harsat mangan ka tawh chângin ka nu ângchhûng nuam ka ngai a; hmána thlahlel taka a
âng ka belh hin lai kha ka mitthlâah a rawn lang uai uai hîn a, ka dam phah sawt sawt hîn. Khawvêl sualna tam takin min hnaih chângin hmána a fuihna leh zilhna thu ha tak takte kha ka bengah a rawn ri nawn awn awn a, chu chuan sual lak atà min thiarfihlìm a ni.

Thiamna aia theihna; theihna aia chhelna, chu chuan chhamna lak atà min hlattîr a ni mai lo va, min thiarfihlìm a ni. Hlawhtlinna dai theu turin hlawhchhamna hlîng inchhuntîr hmasak phawt a
ûl zia min hmuhtîr a, puitlinna lamtluang zawhna kawngah pachhiatna pawimawhzia min tawntîr a ni. Sum hmanga theihna aiin thluak hmanga thiamna min pe a, hlawhtlinna avâng chapona aiin hlawhchhamna avânga inngaihtlâwmna rilru min tuh bawk.

Ka nu min pêk ang khawngaihna chî hi Mother Teresa-in min pe thei lo va, ka nu min pêk theih ang tumruhna leh beih hrâm hrâm duhna thinlung hi Helen Keller-in min pe thei lo bawk a. Ka nu min pêk ang chhêlna hi Dolly Parton-in min pe thei lo va, ka nu min pêk ang thawhrimna hi Oprah Winfrey pêk theih ka ni lo. Ka nu min pêk theih thiamna leh hmasâwnna hi Marie Curie-in min pe thei lo va, ka nu min pêk ang
hanlenna atana rilru leh thlarau châwmna thu hi khawii thuhriltu ropui ber ber kâ aanga hriat ka beisei ngai lo va, ka beisei phâk lo bawk. Ka nu min pêk rohlu hi tu dang tehlulin nge min pe thei ang le? A dawngtu ka nih avânga ka lâwmna hian tâwp ni rëng a nei lo vang.

Ka
hatna duhin ka pa'n min hau va, ka rilru nat hlauvin ka nu'n min hnèm hîn. Chhel nihna man pha turin ka pa'n min vua a, ka nat hlauvin ka nu'n min chûl a; thawhrimna awmzia leh hlutzia min kawhhmuh tumin ka pa'n min chher a, hman tlâk ni turin ka nu'n min tuaihriam bawk a; ka pa ka zah a, ka nu ka ngaisáng thung.

Hetiang khawpa min hmangaihtu, ka nu hi tihnat ka phal ngai lo va, kha zozai lungngaihna a lo paltlang tawhte atâ hahdam tawh se ka ti takzet a. Ka tâna kum tam hrehawm leh harsaa a lo hmanliam zawng zawng hlutna kha, eng tangka maha lei theih a ni lo. A tâna ka tih theih tâwk tih ka duh a, hmangaihna famkim nena duat taka enkawl ka duh a ni.

Ka hma lam thui tak a thlîr
hin avânga harsatna a tawh zozaite avâng khân thiamna leh theihna ka neihte chu a tân ka hmang tawh ang a, keimaha chi nung a tuha chu a vuai mai loh nan ka enkawl ang a, a chawrno hlep hlep hîn ang.

Ka dik lohnaa min fuiha ka lungngaiha min hnèmtu, ka
hatnaa min faka chak lehzual tura min fuihtu, thu min hrilh zawng zawngte duhtâwk mai lova a taka lantîrtu, hmangaihnaa min enkawla ka thinlunga khawngaihna tuhtu, kawng dik lova ka pêng tur min vênga awngaina nena min kaihruaitu, ka nu hi ka theihnghilh ngai lo vang. Amah avânga ka mittui tla hi, kut min thlâk leh min hauh vâng ni lovin, a hmangaihna hlu tak vâng a ni zâwk si a.

Hmánah chuan a mi hmangaihna hrethiam lovin palzûta palzama paldaia lo paltlang mai maiin keimaha a tum chu ka haider fo
hîn. Kha'ng lo hlutzia kha a hun lai khân lo hrethiam ni ila chu, a harsatna tawh tam tak kha ka pumpelhtîr thei tur.. Min hauva min zilh hin pawh hi suala ka pênbo a phal lohzia tilangtu a ni tih tûnah ka hrethiam tawh a, min fuiha min phûrna zawng zawng hi chak lehzual tura thahrui min siamna a ni tih ka theihnghilh tawh ngai lo vang.

Engtikah emaw chuan tu pa emaw, tu nu emaw ka la ni ngei ang. Chu'ng hunah chuan fa enkawl dân hriaa ka thiam theih nan ka nu min enkawl
hin dân ka ngaihtuah chhuak hîn ang a, chhûngkaw hlawhtling ka din theih nan ka pa thawhrimna ka theihnghilh ngai lo vang. Chu'ng hunah chuan an hnu chhuia an zia ka phawk chhuak zo lo a nih pawhin ka theih leh thiam chin chinah ka hlatsan mai lo vang a, ka rilrua an lo tuhngheh tawh thawhrimna leh dawhtheihna nen ka bei zual deuh deuh vang. Chutih hunah chuan ka bulah awm tawh lo pawh ni se, a thil min zirtîrte avângin chatuanin ka thinlungah a nung reng tawh ang.