17 July 2012

Pi Sangi

Pi Sangi hi kan ṭhenawma awm a ni. A pasal hi ama sawi dan chuan rambuai laia vai sipai sawisakna avangin a boral a, a fate pahnih, mipa leh hmeichhia chu a ṭûlpui a. Pa awm lova khawsa an nih avangin harsa leh rethei takin a fate a enkawl a ni. A fakawm asin. Nu hmelchhia a ni hauh lo va, mahse, hmeichhe ṭha lo nei a nih avangin a buai ṭhin. Chu'ng hunah chuan a fa la naupang tak takte chu an mangang ṭhin asin aw...

Chhûngte bulbal a nei lo va, chhûngte anga a ngaihte hi hmusittute an ni. A hnen aṭanga hlâwkna leh ṭangkaipui theih tur thil a neih chuan chu'ngho chuan an hnaih sauh sauh va, an duh an lak hnuah an kalsan leh mai ṭhin. A fa la naupang tak pahnihte chu rualawta an awm mawlh a hlau va, rim taka inhlawhfain a fate sikul kalna tur leh an chhûngkaw khawsak zelna tur a thawk chhuak ṭhin.

A nulat laia ngaizawngtu pakhat chu kan khuaah chuan kohhran upa, pa langsar leh hausa ber pawl a ni tawh. A lo thlan zawk loh avanga a inchhir thu mi hrilh keuh keuh ṭhin. Mahse, tunah chuan hmeithai berh të mai, natna khirh tak avanga buai châng nei, mite endawng leh hmuhsit mai a ni tawh, Pi Sangi chu.


An ṭhenawm chiaha awm kan nih avangin an chhûngkua hre chiangtu ber kan ni âwm e. A buai châng chuan an tukverh, ral lehlam ep chiahah hian a dâk chhuak a, a pasal thi ta kha a au ṭhin. A ban a vai vak vak a, a pasal bula kal angah a inngai tlat ṭhin. A fate pahnih chuan an nu chu ṭap chungin an khap a, engmah a sâwt ṭhin si lo. A thâwm hretu mak tite chu an lo kalkhawm a; chu'ng lo kal khawm zinga ṭhenkhat chuan an hlau va, a ṭhen chuan an khawngaih a, a ṭhen chu a au hla avangin an nuih a za a. A ziaawm hnuah chuan an kal darh leh mai ṭhin.

A sam ṭuak var vo hmuh chuan a zin kawngah harsatna leh retheihna eng zat fakau paldai tawh tak maw, tiin a ngaihtuah loh theih loh va, a dam chhûngin zalenna famkim a hmu ngai dawn lo va, a thawhrimna ata a hahdam ngai dawn lo a ni tih hriat phei chuan ngaihtuahna a tithui a ni. Amah maia a awm pawh hian a hlim tawk em em a, a phun melh melh mai ṭhin. Amaha rau a thawh tawh chuan zan pawh ni se, an kawtlaiah Pathian thu sawiin a au va, a in chhûngah thuk mei êng hnuaiah a zai a, a lâm mai a ni.

Amah theihnghilh ngai lotu chu Pathian-in a theihnghilh bik hauh lo. Pitar të anga ngaih mah ni se, a mit a var em em a; taksaa pangngang hlîng lût te, hlîng te reuh të lût ṭhin te hi a khei chhuak thiam em em a, mi'n an rawn pan ṭhin. Chutah chuan amah khawngaihtute chuan lawmmanah buhfai no. 1 te an rawn ken a, chu chu a tân a hlu em em a ni.

A ṭhenawmte hi min theihnghilh ngai lo. Eitur ṭha a neih châng chuan amah maia ei phal lovin min rawn suah ṭhin. Zanah a khawhar hi a lo lêng ṭhin a, ka nu nen inkawm pahin a chanchin te, a fate hmun danga awm chanchin te a sawi siap siap a. A fate a ngai thei em em a, an hming a lam a lam ṭhin. Kum tawpah an chhûngkua inhmuhkhawm hun a thleng ṭâwk ṭhin a. An va hlim ṭhin tak em!

Amah a hrisel loh tawh mah nâk laia, a fanu neihchhun paw'n a chhûn kher mai. A fanu chu, a rilru a hah deuh châng te, thu thinṭhawng a dawn châng te hian a khawng ṭhin a, buaipui fe a ngai a, patling pahnih pathumin kan buaipui ta ṭhin a nia. Zan laia a buai châng te hian puitu tur zawngin kan vak chhuak ṭhin. A fapa neihchhun pawh û anga ka ena ka kawm a nih avangin an inah ka riak fo va. Ka ngai thei khawp mai. A fapa chuan khawpui lamah mahnia in luaha inhlawhin lehkha a zir a, a nu leh a naute tân inhnemhnanna tling tur chuan kum tam a la mamawh a ni. A awmbo hlânin a nu, Pi Sangi te nufa chuan in an lo nghak ṭhin. Pi Sangi fanu neihchhun chu nula a ni ve a, inleng te pawh a nei ṭak ṭak a. Meikhu leh bati hnuaiah inleng a lo chhawn ṭhin.

A fanuin pasal a neihsan ṭum chuan a lawmpui em em a, mahse, a khawhar a zual hle thung si a. Amah khawngaihtute'n leipui tur an vahsak a, buh chînna tur lo zîmtë te vahsakin chutah chuan buh te chîngin nitin a feh chhuak ṭhin a. Chutianga a thawkrim hle chung pawhin a vanduai a kaltluang a, a buh zawng zawng chu ramsain an tihchhiatsak a, buh seng a hun meuh chuan buh ṭin khat leh a chanve awrh bak a chang ngai lo. Chuti chung pawh chuan a vui ngai lo. Hna a la thawk thei ṭawk ṭawk a, amah khawngaihtute'n tarchawmna an ngaihtuahsak beitham tak hmangin buhfai a la lei thei a, mi lovah fehin a inhlawh thei bawk a, a eitur na na na chu a thawkchhuak ve zel ṭhin. A vanduai asiamin a fanu pasal nei a rawn haw fo va, a rilru a hah ve ṭhin ngawt ang le.

Changkan deuh inbeiseiin a fapa chuan a awmna lamah a hruai a, a in neihchhun, a pasal hnutchhiah liau liau pawh chu an hralh ta a. A insawnna lamah pawh chuan a natna chuan a la zui a, a la buai zel a. An in luahna lai chu khawpui hmun lûn lai a ni si a, miin mak an ti em em ṭhin. Ṭawngṭai dam thei an tih te pawh an pan a, rei lo te hnuah a ngai të bawkin a buai leh ṭhin.

A fapa chu zirlai mai a ni a, a inhlawh chawp a, chutiang chuan an khawsa ṭawk ṭawk a. Tlangval chhuak ṭan tir të hi a ni a, bialnu te pawh an nei ve a, a nu chutianga a awm chu hrehawm a ti thei em em a; TNT-a dah te an rawt tut tut ṭhin naa, mahni hringtunu ngei rilru buai enkawlna hmuna dah tura thutlûkna siam chu a rila rah a fa tân chuan a aia khirh leh chuang tur a awm lovang; a ngaingam ngang lo a ni.

A rei telh telh a, a buai zing tulh tulh a. Thingtlang khaw hla taka a unau awmte bula awm a duh tlat a. A fapa tân chuan duhthlan tur dang awm hek lo, an han inhruai leh rih a. Mahse, chu'ng a unaute bulah pawh chuan a tlatlum thei tak tak chuang lo. Anni tân chuan nu rilru buai, mi chuangtlai mai a ni tawh. Rei pawh awm lovin a fapa bulah bawk chuan a lêt leh a — a vahvaihna khua a sei ngawt mai. A taksa harsatna chu thuhran, an khawsak a harsa em em a, an ngei lo chauh a ni. A damdawi man tur pawh an nei zo mang lo va, eizawnna awlsam zawk dapin in luahna hmun an sawn zut bawk a. A taksa mai bakah a rilru a hahdam mawlh lo.

Kha'ng hun kha kum eng emaw zat a vei tawh a, hman leh tun inkarah thil tam tak a lo thleng ta a. Tunah chuan a sam a ṭuak var vo tawh a, a hmai a zur ṭiap tawh a, a kum pawh a lo upa ta. A fate nen an awmho leh tawh a, tu pawh nei dih diah tawhin a tute'n a nun an tihlim em em a, a monuin duat takin a enkawl bawk a; a tute mawlh chu a buaipui tâwk em em a ni. A natnain a tibuai ngai tawh lo va, a hmel thim khuih ṭhin pawh kha êngin a rawn thlâk ta a. A chênna in chhûngah khawhar zai ri chauh ni lo, hlim nui ri pawh hriat tur a awm ve tawh a; a fate mangang ṭap ri kha a tute chhangchhe ṭap ri-in a thlak tawh bawk a. A buai laia awmze nei lova a au vak vak ṭhin kha bansanin mumal tak leh ngaihngam takin an in chhûng tlâwmtë-ah a ṭawngṭai ve thei ta!

Khawvel khawsaknaah chuan la rethei hle mah se, nun hausa tak nei chungin a la dam ve ṭawk ṭawk a ni.