31 October 2015

Thalaite'n thikthuchhiatna huang kan zauh a hun ta!


Tunlai chu, Mizo thalaite hian eng nge kan buaipui, tih mawlh hi rilruah a lang lian a! Thil tak tak buaipui peih hi kan tlem sawt riau em aw tih ngaihtuahna neih a awl ta rum rum mai.

Bawngkawn-ah Baptist biak in-in mi kut a tuar a, kan sawi zui duh zawng tak a lo ni hlauh! A taka thil ti peihte zarah thuthmun atangin thil awmzia kan hria a, facebook whatsapp velah ngaihdan kan sawi a; kan ngaihdan kha midang pawmtir tumin kan han bei tang tang a; heng kan inhnialna tam zawk hian ram leh hnam hmasawn nan tangkaina a nei lo.

Miss Mizoram pasal neih chungchang chu facebook atanga ram hmangaih thinte lawm zawng tak a lo ni leh hlauh mai! Ram leh hnam tana a taka pen chhuah chu sawi loh, khawi hmun pawha awmte tana tih theih chanchinbu leh hmun dang danga ram hmangaihna thu emaw, ram leh hnam himna thu emaw la thai tial hlek lote kha 'hnam dang pasal neih; sawiin tawngkam chhe ren lo lovah an tang a! Hei hian min chimral inpeih rengte zak a dêk pha lo!

Heng thilte hi buaipui loh tur tihna phei zawng a ni lo. Kan buaipui ang a, kan pawrna lam erawh thlak thung ang u hmiang. Kumin chhungin sawrkarin dân kalhin SSA zirtirtu 58 ngawt an la a, facebook-ah thalai pawl leh thalai pàwrte'n an ngaiven peih lo! Dân kalh bawkin RMSA zirtirtu tur 94 lak a ni tawh a, facebook-a ram leh hnam hmangaihte hian a hriat pawh an hre lo vang! Sponsor-tu awm lovin temporary ILP pek chhuah theih a ni tawh a, heng te hi engtiang chiaha hlauhawm leh pawithui thei nge a nih, thalaite hian kan ngaihven lo!

Eng kan ti ta nge ni aw... Dan kalha thil tih hi ngaiah kan neih ta em ni? ILP kan neih hi tha taka kenkawh a nih chhung chuan, hnam dang chimral aiin Zoram hi mi hausa sa leh thiltitheite khawvela a chhuah a hlauhawm zawk. Kan ngaihven zawng leh kan buaipui zawng hi thlak a hun takzet. Mizo thalaite magic hi a hmanna turah hman a la ni lo. Kan magic hian min kalsan hun a la nei dawn. Kan thîkthu tihchhiatna huang zauh ila. kan khawlai lungin biak in ni lovin dân kalha thil ti thin thiltitheite in deng tawh rawh se!



28 October 2015

Mobile phone i tlo zawk nan

Tunlaiah mobile phone tel lovin kan awm hleithei tawh lo a ni ber a. Mobile phone changkang tak tak a lo chhuak a, smartphone chi hrang hrangah application changkang leh tunlai ber ber kan dah ta rup mai. Kan nitin nuna a pawimawh tawh em avangin, mobile phone hi a tangkai a, engtin nge hmang ila a daih rei ang le?

Mobile phone reng reng battery hmang a nih vek avangin battery chungchang han sawi hmasa ila. Mobile phone battery hi chi hrang hrang awm mah se, tunlaiah chuan Li-Ion hi hman lar ber a ni. He battery hi a thar lei zawh hlimah, a tlangpuiin darkar 4-5 chhung charge ngei ngei tur a ni. Hman vat kan duh thin avangin a thar tirha a charge mamawh zat pawh charge hman lovin kan khawih thin a, hei hian battery a titlo lo.

Battery leh phone insîkna hi thlatin vawi khat tal tihfai ziah a tha hle. Charge pawh hi duh hun hunah charge tur a ni lo. A battery a zawh hma deuh, 9% vel a la awm lai hian charge chauh tur a ni a, battery empty emaw hnuah charge aiin a tha zawk. A battery a zatve vel la awm laia charge hi a tha chuang lo. Tin, charge a full hmaa phawi loh a tha. Li-Ion battery hian virtual memory effect a nei a, a full lova charge zin chuan, a full anga a awm hnuah pawh a daih rei thei tak tak chuang lo. 

Chumi piah lamah, battery a full hnua rei tak charge a tha lo va, battery a tichhe hma. Chutianga full hnua rei tak charge fo hian rei lo te hnuah battery a puak thei a, a puah chuan battery chhin theih lohvin a awm hial thin. Mobile phone charge chunga mutsan te hi tha lo tak a ni. A tlangpuiin battery hi indicator nei a nih avangin charge full veleha phawi vat a tha hle.

Battery charger chi hrang hrangte hian a tlangpuiin rating an nei vek a, chuvangin phone charger chi hrang hrang hman lawr nasat hi a tha lem lo. Tunlai phone-ah phei chuan data-cable a awm deuh vek tawh a, a pin a inmil mai avanga vuah chawt te hi chîn tam loh a tha. Heng data cable te pawh power rating nei vek a nih avangin, a tira i phone nena inmil sa thlap bak kha vuah loh a him.

Phone battery tlo nan phone-a hla, milem, video leh application tam tak dah loh a tha; a tam poh leh battery a heh hlea ngaih a ni. Signal awm lohna hmunah chuan phone switch off emaw, flight mode-a dah tur a ni. Tunlai smartphone-ah chuan application tam tak dah theih a ni tawh a, hengte hian battery a heh hle. Application te hi kan hman loh lai hian, kan uninstall ui a nih pawhin force stop hmeh keuh mai tur. Application hman loh laia a lo run ve char char chuan battery a ei na hle.

Tunlaiah chuan web browser hrang hrang bakah whatsapp, telegram, wechat leh a dang dang kan hmang lar ta a. Heng thilah te hian thlalak leh video automatic download-ah dah loh tur a ni. Automatic download-a dah chuan hriat loh lai hian battery bakah pawisa a hek duai zel. Web browser pawh hman loh lai chuan exit zel a tha bawk. Internet hrim hrim hi kan hman lai a nih loh chuan date off hmak zel ila, battery a hek lo a ni mai.

Thil ho tak anga lang chu, camera flash hian battery a heh hle tih hi! A flash a that poh leh a heh ting mai a, chuvangin, camera flash hi a tul têah lo chuan off zel mai kha a tha ber. Ringtone atana hla chi hrang hrang hman hi battery-in a tuar duh viau a, ringtone leh wallpaper te hi a awm sa pangngai hman a fuh ber. Vibration mode hian battery a heh bawk. Animated screen saver emaw, live wallpaper, wallpaper che thei kan tih mai chi hian battery a heh em em bawk.

Bluetooth hman tam hian battery a titlo lo an ti teh tlat. Bluetooth headset kha tangkai taka hman theih ni mah se battery-in a tuar duh hle. Thil hmanhmawhthlak a nih lem loh chuan, memory card lakchhuaha card reader hmang emawa inpek mai hian a him ber.

Mobile phone changkang tak tak a tam tawh a, camera megapixel sáng tak tak, man pawh to em em si lo a chhuak ta nual mai. Camera hi hman dan thiam a awm ve tlat. Smartphone man tlawm ho hi camera 5 megapixel a ni tlangpui a. Zoom pawh 5x atanga 10x vel chu a tlanglawn a ni ang. Digital zoom aiin smart zoom ang chi hi a fiah zawk thin. Entirnan, i phone camera kha 5 megapixel ni ta se, i thlalak size kha a sáng berah 5MB vel a ni maithei. 5MB-a i dah chuan, thlalak zoom chunga i lakin thlalak chu lian hle mah se, a fiah phah chuang lo. Smart zoom i hmang a nih chuan, thlalak size kha 5MB aia hniam hretah dah la, zoom chungin han la ta la, 5MB-a i daha zoom chunga i lak aiin a fiah daih ang. Smart zoom hmang camera te hi a tlangpuiin a size lian bera thlalak dah hian a zoom theih loh thin a, a size lian bera daha i zoom thei a nih chuan smart zoom a awm lo tihna a ni mai.

Bluetooth hmangin games a khelhho theih tawh a, video calling/video conferencing te pawh a theih ta! Phone battery a la rim telh telh zel dawn! Phone thar lei dawnah mAh sáng sâng thlang mah la, i battery i dim thiam chuan si loh chuan a sâng thlâwn mai a ni!

19 October 2015

'Nghilh Loh Nan' thlirlawkna

LEHKHABU THLIRLAWKNA
Dt. 18th October, 2015 (1:00PM) @Conference Hall, Govt. Aizawl College

Lehkhabu : Nghilh Loh Nan
Ziaktu : J.H. Lalrinzuala & Darthansanga
Phek : 156
A man : Rs. 100
Thlirlawktu : T.S. Khupchong

Vawiina kan lehkhabu tlangzarh tur, ‘Nghilh Loh Nan’ tih hi kumin, 2015 August ni 1-a min boralsan ta, Mizo Department-a kan zirtirtu, Sir P. Dokunga hriatrengna atana chhuah a ni a, a bu chhungah hian a thlalak tarlan a nih bakah a hriatrengna atana hlan a nih thu te., mi hrang hrang pasarihin a thlahna thu tawi an ziahte dah a ni a, a bu hmingah pawh ‘Nghilh Loh Nan’ tih vuah a ni. Hetianga mahni zirtirtute chawimawina chang hria zirlai kan awm hi a lawmawm hle.

A lehkhabu keuhawnna atan, kum zabi 19-na laia Irish poet lar tak Oscar Wilde-a’n kum 1881-a a poem phuah ‘Requiescat’ tih chang 5-na (chang tawpna ber), V.L. Rorelfela lehlin chu dah a ni a,

Peace, peace, she cannot hear
Lyre or sonnet,
All my life’s buried here,
Heap earth upon it.

tih chu Rorelfela hian,

Lungmuangin, thlamuangin, a thleng phak si lo maw
Perhkhuang leh runthlak hlarua zawng paw’n;
Hetah ka hringnun ka phum bo ta maw,
He thlan vûng khawvel chungah hian.

tiin a letling a, a ngaihnawmin a ngaihawm riau nia!
He lehkhabu hi inziah tawm a nih angin, J.H. Lalrinzuala thu leh hla pasarih leh Darthansanga thu leh hla pariat dahkhawm a ni a; a vaiin fiction 8, translation 2, essay 5 a awm. J.H. Lalrinzuala hian tun hmain lehkhabu pahnih ‘Gemini’ leh ‘Mimawl Khawhar Sulhnu’ tih chu a lo tichhuak tawh a, a hnuhnung zawk phei chu kumina a tihchhuah a ni nghe nghe. Darthansanga hi a lehkhabu tihchhuah pakhatna tur a ni ve thung a, thu leh hla thiam leh tui tak a ni a, essay leh poetry tam tak a lo phuah tawh a ni.

J.H. Lalrinzuala thuziakte hi dah hmasak a ni a; thuziak awm hmasa ber ‘Thihna Hrualhrui’ hi short story ngaihnawm tak a ni a; tragic story, thawnthu lungrun leh lungchhiatthlak tak a ni. Lemziakthiam (artist) pakhat leh a customer nula inngaihzawnna chungchang a ni a; lemziakthiam Zorina leh Didini hi an inhmangaih hle a, mahse, an nu leh pate’n harsatna an siam a, Zorina rilru na chu zungawlveiah a chhuak a, a tawpah Didini pawh a tawpah a inawkhlum a ni. A changtu an tam vak lo, Didini, Zorina leh Didini Pa an ni deuh mai a; nimahsela, mittui ko chhuak awlsam tak a ni thung.

Thuziak thiam kan tihte hi thumal remkhawm thiam an ni mai a; C. Thuamluaia thuziakte a ngaihnawm bik em em chhan pakhat chu, thumal a remkhawm thiam piah lamah a thuziakte mitthla nghal theihin a sawi chiang thiam bik tlat hi a ni. Chutiang chiah chuan J.H. Lalrinzuala hian thumal a remkhawm thiam a, a thuziakte hi mitthla theih turin a sawi chiang thiam bik tlat. ‘Thihna Hrualhrui’ paragraph khatna atang hian chu chu a hmuh theih nghal. “...a khât tawka motor tlân thawin vaivut a chhem leng chum chum leh, dawr tê inkhar hulhliapa uipain uinu hur a hêl chauh lo chu thil che dang reng reng hmuh tur a awm lo...” a han tihte hian nipui chhun nisat vawl vawl lai boruak a hmuh theih tlat.

Thawnthu-a thawnthu chhawng awm hi a ninawm hma hle a, nimahsela, he thawnthua Mizo thawnthu lar tawh lo tak, ‘Siruki te unau’ thawnthu lo lang hi a ninawm hauh lo thung. Remchang taka a thawnthua Mizo thawnthu tha tak a zep tel thei hi a themthiam hle a, hei hi a thuziak tihlutu tur a ni. He thawnthu hi thalai thawnthu, thalaite tana ngaihnawm tur a nih rualin, nu leh pate tana chhiar ngei ngei tur chi a ni. Fate ngaihzawng chungchanga inrawlh thûk luat hian thil tha lo zawk a hring thei tih a tilang chiang viau.

‘Ka Fanu Hnena Lehkhathawn’ hi lehlin a ni. India ram Prime Minister hmasa ber Jawaharlal Nehru-a’n a fanu Indira Gandhi hnena a lehkha thawn tam tak zinga pakhat a ni. Kum 1928 khan Indira Gandhi kha kum 10 mi lek a ni a, tuna Uttarakhand state ni ta huam chhunga khaw pakhat Mussoorie-ah lehkha zirin a awm a, hetih lai hian a pa Jawaharlal Nehru chu Allahabad-ah a awm thung. A lehkha thawn hi saptawnga a ziak a ni a, lehkhathawn hmangin a fanu a fuih thin a, thu tha tak tak a hrilh thin. Chung a lehkhathawn hrang hrang 30-te chu dahkhawmin, kum 1929 khan Hindi novelist Munshi Premchand chuan Hindi-a letlingin a tichhuak a, heta tang hian mi hriat lar a hlawh hle a, American dramatist pakhat Lavonne Mueller phei chuan drama-a ziah theih tura her remin, a film-in an siam nghe nghe.

He lehkhabu ‘Nghilh Loh Nan’ tiha lehkhathawn awm erawh chu, lehkhathawn dahkhawmna bu a chhuah hnua ziah a ni a; hetih lai, kum 1930 lai vel hian Jawaharlal Nehru chu politics avangin Naini jail-ah a tâng a; jail atang hian November ni 19, 1930-a Indira Gandhi kum 13 tlin pualin lehkhathawn ropui tak a ziak ta a ni. He lehkhathawn hi infuihna thu tha tak, tun hnu thleng pawha a chhiartute tana chakna petu a nih avangin Mizo tawnga dahtu, J.H. Lalrinzuala hian Mizote tan thil ropui tak a ti, tih loh rual a ni lo.

‘Panlai Aw Kan Hlim Lai’ hi narrative essay a ni a, a ziaktu J.H. Lalrinzuala’n a naupan lai chanchin a ziahna a ni ber. Mi tu pawh hian naupan lai chanchin ziah tur kan nei theuh va, chanchin intawm lah kan ngah narawh. A bikin thingtlang naupangte hian naupan lai chanchin kan intawm fur a; chutiang mite tan hlei hlei he thu hi a ngaihnawmin a rinawm. Kan naupan lai chuan thiante nen bûk kan sa a, luiah kan kal a; thiante nen hun kan hmang nasa thin hle. Hmeltha kan tih zawng te kan han ‘vei’ em em thin kha a ni a. Chu chu he essay-ah pawh hian tarlan a ni a; a ziaktu nen hian naupan lai chanchin kan lo intawm reng mai.

A ziaktu hian thu tawi tê tê, dik leh nalh deuh deuh chheh hi a thiam riau.  Kum 1939-ah daih tawh khan Kaphleia khan ‘Thlirtu’ essay-ah mihringte lunglen chhan chu ‘Kan awmdanah duhtawk kan ngah loh vang a ni’ tiin a lo ziak tawh a. Hemi chhang chiah ni turin, J.H. Lalrinzuala hian ‘Mihringte’n kan lunglen changa kan hriatchhuah thin chu, kan hun kal tawhte a ni...’ tiin a ziak a, a dik hle. Khawvela thusawi ropui, mi ropuite thu fing tak takte hi thudik awm sa vek a ni a; midangte’n sawi chhuah nachang an hriat loh emaw, midangte sawi chhuah aia chianga sawi chhuah emaw a nih avanga thusawi ropui lo ni ta a ni hlawm. Tuna J.H. Lalrinzuala thuziak pawh hi chutiang chu a ni a, thusawi ropui tak chu a ni chiang. Phek 32-naa - ‘in va nalh ve’ a lo tih chang chuan mitmeng a zim a, kareh a zau thung’ tih te a sawi chhuak thiam riau! Lawm avangin han nui sak ta ula, in hrethiam mai ang.

A ziaktu hian thil sawifiah a thiam kan tih tawh kha. Phek 31-naah tihian a ziak a: ‘Khabe sai, khup inkhawng hlawk hlawkin chu li uk chu kan han chhuahsan a; pialtlep hlai hlep hlawp, ni êngin a chhun sat vurah chuan kan han thu dîr tluk tluk a...’ tiin. Hei ngat phei hi chu, C. Thuamluaia pate a ni ringawt. A imagery a sáng hle a ni.

He thawnthuah hian horror story a awm nual a, chung zinga a hmasa ber ‘Ka Thlahrang’ tih thawnthu zet hi chu a ngaihnawm a, a hlauhawm a, a bengvarthlak bawk! A hming mai chuan ‘tualsumsu’ hi kan hre theuh tawh ang a, mahse, eng nge a nih chiah, engtiangin nge a awm tih chu kan hre kher lo vang. Hei hi a ziaktu hian thawnthu hmangin min hrilhfiah a, chu chuan a thawnthu a tihlu hle. A ziaktu hian ama chunga thleng angin (auto-diegetic narration) a ziak a, ‘tak tak a ni em?’ tia zawhna a dawng nawlh nawlh a nih pawh a âwm khawp ang. A plot hi awmze nei takin a duang a; mi chapote chu hnuhhniamin an awm thin tih a rawn pholang a, a thlahrang hi vai sumdawng chapo tak tihthaih nan a hmang a, a chimawm ngawt mai!

‘Corbett’s Kunwar Singh’ hi lehlin tho a ni a, a letlingtu J.H. Lalrinzuala hi translator tha tak a nihzia tilangtu a ni. A lehkhabu hmasa ‘Mimawl Khawhar Sulhnu’-ah pawh lehlin a awm nual tawh bawk. Jim Corbett hi India rama sakei sual peltu hmingthang a ni a, a sakei pelh dan chungchang chu lehkhabu eng emaw zat ziakin a chhuah tawh a. Tuna kan sawi tur hi kum 1952-a a lehkhabu tihchhuah, ‘My India’ tiha thuziak pakhat a ni. P.L. Liandinga hian lehkhabu a lehlin reng rengin, ‘Zo’ takin, Mizo version zelin a letling thin a; hei vang hian a thu lehlin hi chhiar a nuamin a ngaihnawm bik hliah hliah thin. Chutiang bawk chuan he thu letlingtu pawh hian Mizo takin a letling a, ‘tau thla’ ‘tuipuisuthlah’ tiarep’ ‘tuibur hmuam da’ tih leh a dang dang pawh hmuh tur a awm nual a, Mizo tak a ni. A letlingtu hi thuziak lehlin uar zel sela a duhawm hle.

‘Gabriela’ hi P.C. Vanlalhmangaihzuali thuziak, J.H. Lalrinzuala’n a siamremsak niin a lang. Fantasy fiction a ni a, tuihnuai khawvel leh leichung khawvel suihzawm a ni. Mermaid lal fanu Gabriela-i hian mihring a ngaizawng a, a mihring ngaihzawn nena an intawn dan leh an ruk chhuah dan a ni ber. Mizote hian exotic fiction (ram dang behchhan thawnthu) kan ngah lo hle a, he thuziak hi chutiang thawnthu a ni a; thawnthu tawi tê (flash fiction) a ni a, a changkang khawp mai. Ka hriat sual loh chuan, hmeichhe hmingah chuan Gabriella (‘l’ pahnih dah tur) ni âwm tak a ni a, hetah erawh mipa hming angin dah a ni tlat thung a; ka hre sual zawk pawh a ni maithei e.

‘Puma Zai’ hi descriptive essay a ni a, expository essay a tih theih bawk ang chu.Puma Zai lo chhuah dan leh a darh dan kimchang taka tarlanna a ni a, a bikin literature zirlaite tan chuan a hlu ngawt ang le. Kum zabi 19-naa lo chhuak Puma Zai hi Zoram-ah a lar hle a, kum zabi 20-na intan tirh lai vel phei chuan sakhaw thar Kristian sakhua pawhin a thuanawm phah hle. Chutih laiin kum 1911 velah mautam a lo thleng a, nasa takin tam a tla a; kum 1913-ah harhna a lo thleng bawk nen, Puma Zai hi zawi zawiin a chuai ta a ni.

A ziaktu hian lehkhabu a râwn zau viau a, nimahsela, a thuziak tawpah work cited/reference a dah lo hian a tikhingbai deuh. Research behchhan emaw, zirbingna thuziakah reng reng chuan reference dah theih a tha hle. Mizoram University Mizo Department-ah pawh khuan ‘Puma Zai’ hi an zir a, hetah hian Prof. R.L. Thanmawia ziah dana zir a ni. Ani hi hla lam research beia doctorate degree neih nan hiala hmang a ni a; Puma Zai chungchang ziaktu dang awm nual mah se, a thuziak a rintlak deuh berin a rinawm. Mihring inkohna ‘Pu’ tih vel hi thu leh hla huang chhungah chuan dah loh a pawi lo zawk.

Darthansanga thuziaka a hmasa ber ‘Ka Nu Mangtha’ tih hi descriptive essay a ni a, suangtuahna hmanga ziah a nih avangin, imaginative essay a tih theih tho awm e. He thuziak hian nu hlutzia a tilang chiang hle. A chhiartute zingah nu boralsan tawh an awm ngei ang a, anni tan ngat phei chuan mittui titla zawih zawihtu, thuziak tihbaiawm, ngainatawm tak si a ni ngei ang.

Kum 1764 khan English author Horace Walpole chuan novel pakhat ‘The Castle of Otranto’ tih a ziak a, hei hi gothic fiction hmasa ber anga ngaih a ni. Mizote hiamn gothic fiction kan ngah lo hle a, a novel phei chuan kuttangthliaka chhiar tham chauh a la chhuakin a rinawm. Chutiaang a nih laiin Darthansanga’n gothic fiction ngaihnawm leh Mizo tak mai, ‘Mihrang Sulhnu’ a ziak hi a lawmawm hle! He thawnthu hi ngaihnawm hlauhawm tak a nih avangin dawihzep deuh tan chuan chhuna chhiar a sual lo maithei. Kum 1930 lai vel Mizoram hmarchhak lam behchhana ziah a ni a, a ziaktu hian a hun lai khawvel a ngaihruat thiam viau. Thingtlang atanga chiseh leh chakkhai lam tura ke ngata Aizawl an zin thu leh, an zin haw lama an thil tawn tihbaiawm tak chanchin a ni a; a ziaktu hi a thuziakah a tel avangin homodiegetic narration kan tih hmanga ziah a ni a tih theih ang.

J.H. Lalrinzuala thlahrang kha khawpui thlahrang a ni a, Darthansanga thlahrang erawh chu thingtlang thlahrang a ni thung! James Dokhuma kha saphovin story-teller an tih ang chi a ni a; pa titi thiam takin thawnthu ngaihnawm tak a sawi ang mai hian, a ziaktuin a thawnthu ziak hi min chhiartir a ni mai lo va, a hrilhin min hrilh a ni. Darthansanga pawh chutiang chiah chu a ni. A duhna lamah thil sawi uar pawh a lo thiam narawh e! ‘...pi leh pute pawhina sa tuia an sawi nghalmal sa ngei mai biang puam tãl tãla kan han thial chu mitthite kan hlêp hliah hliah...’ (phek 95) tih lai phei hi chu chhiar zawnga chil lem rik khalh a awl hle! A hràn dan vel erawh sawi tam lo ila a him ang!

‘Ka Hringnun’ hi naupan lai chanchin seprawtuina essay a ni a, lehkha a zir a ziaktu hian a naupan lai chanchin min hrilh keuh keuh va, a ngaihnawm hle. Romantic Period hun laia English essayist lar tak Charles Lamb khan personal essay a ziak nasa hle a, kum 1820 chho vel atangin ‘London Magazine’-ah a ziak thin a, ‘Dream Children’ phei chu a naupan lai hun a seprawtuina, hlimawm leh lungkuai tak a ni. ‘Ka Hringnun’ pawh hi chutiang deuh chu a ni a, a hlimawm a, a lungkuai a; a tawp lama a college zir dan a ziahte phei chu nui ruh ruh chunga chhiar theih tak a ni. Pakhat chiah - ‘Zing lamah maian, tlai lamah maian bai thar leh a thing’ (phek 113-na). Darrokima te pawhin thiam takin mahnia in an luah dan an ziak a, mite’n ngaihnawm an ti hle. Khum atanga pen thum leka thleng sila pen li-naa rawng bawl thintu thuziak hi saphovin ‘light reading’ an tih ang chi, thuziak hlimawm tak a ni.

Thuziak lama tui thian neite hi mi vannei tak an ni. An hming chu a thlawnin lehkhabu-ah thai lan a ni thin a, hlu tak a ni. He essay-ah pawh hian a ziaktu thiante hming a lang nual a, anni tan chuan ‘Nghilh Loh Nan’ lehkhabu hi zan tam mutpui chi a ni hial ang.

Thawnthu tawi ‘Lalhriatchhungi’ hi tragic story a ni a, a lungchhiatthlak tluan zak. Thingtlang atanga Aizawla lehkha zira awm tlangval pakhat leh nula pakhat, nau pai lai mek inngaihzawn chanchin a ni a, a tawpah a changtunu chu nau chungah a thi. Chhiartute mittui titla thei tur thawnthu a ni. Darthansanga thuziakah reng reng, a ziaktu hmuh tur a awm zel a, ama chanchin a ziak tihna phei zawng a ni lo va; thawnthu phuahchawp pawh ni se, midang chanchin ziak pawh ni se, ‘hei hi chu amah a ni ngei ngei ang’ tih theih tur a tel zel a, hei hi a signature tur a ni.

‘Savawm Pûk Huai’ hi paranormal fiction a ni a, a thawnthu hming ang hian ‘huai’ lampang a ni. Savawm Pûk huaite leh a bul khaw mipuite inkara harsatna (conflict) awm tarlanna a ni ber. He thawnthu-ah hian hmanlai kan pi leh pute’n ramhuai chi khata an ngaih ‘tau’ lan dan pakhat ‘tau-meichher-chhi’ a awm a, a thuziak tihlutu a ni ngei ang. Hman atanga tun thleng hian naupang mai ni lovin puitling pawh an bo fo va, titi a titam thin hle. Mi bo hi tunlai hun thleng pawha an la awm avangin, he thawnthu tawi innghahna (setting) hi thingtlang leh ramhnuai niin, a changtu (character) pawimawh pawh ‘huai’ ni mah se, a tunlai hle.

‘Mizoah min ngai lo’ tih hi impersonal essay huanga khung theih tur a ni ang. Nikum lawk, 2014-a Haflong-a ZOFEST hmannaa a thil tawn a ziah chhuahna a ni a; khami tum ZOFEST neih a nih dawn khan eng emaw buaina a awm a nih kha. A hmun ngeia kalin a ziak hi a ngaihnawmin a bengvarthlak hle. Thuziakmite hian khawvel tan chhiar tur min pe a, anni zarah hmun dang chanchin chhiar tur kan neih phah thin. ZOFEST-ah pawh mi tam tak an zin a, an thil hawn pawh a inang lo hlein a rinawm. Darthansanga erawh chuan Mizote tan hnam inpumkhatna thu a rawn hawn a, a daih rei khawp ang.

‘Rawirup’ hi thawnthu tawi a ni a, a thupui hi mihring hming a ni! Saiha khuaa chêng, Nunui hringnun a ni ber a; Nunui hian naupang tê a nihin khuaikhem a tâwk a, chu chuan a nunah harsatna a thlen chho nasa hle. A tawpah chuan a khuaikhemtu a inawkhlum ta a ni. Rawirupi leh Nunui hi thian inkawmngeih tak an ni a; a thupui han en chuan Rawirupi hi a thawnthua a lailum luahtu ber ni âwm tak a nih laiin, Nunui chanchin hi a lailum luahtu tawk zawk a ni. Thian inhmangaihna thûkzia bakah, thil tisualtu chunga hremna a tlâk dan lantir a ni a, tunlaia chhungkaw harsatna tam tak chu he thawnthu hmang hian tarlan a ni.

He lehkhabua thuziak awm hnuhnung ber ‘Ka Zinna Ram Tokyo’ thuziak tawi hlimawm tak a ni. A mumanga Air Asia (a mei lama 07 inziak)  hmanga Tokyo-a zin, Japanese chaw tui Bataum foods te eia laptop vai tên nawlh nawlh kha, a harh hnuah Tokyo-ah ni lovin Parvachawm-ah a zin a ngai a, Bataum foods ni lovin Batawm sauma bai an hmeh a, Air Asia hmanga zin kha ke ngatin a zin a, Air Asia meia 07 inziak kha Burma siam a Tokyo pheikhawk number a lo ni a, laptop khai thên lauh lauh khan vawkte a khai let tawp tawp zawk a! He thu tawi tê hi a ngaihnawm riau. Thil awmze inhlat lutuk (paradox) a hmang thiam hi a themthiam ngawt mai.

He lehkhabu-ah hian grammar, punctuation, spelling mistake adt. a awm nual mai a; chungte erawh chu tarlang lovin kan kal kân a, a chhiartute review-ah chuang thung teh se!
 
A hnunga dingte hi a ziaktu JH Lalrinzuala leh Darthansanga te an ni
 (Vawiin, Dt. 19th October, 2015; 1:00PM-a 'Nghilh Loh Nan' tih lehkhabu, J.H. Lalrinzuala (GAC SU Magazine Editor ni mek) leh Darthansanga (GAC SU Indoor Games Secretary ni mek)-te lehkhabu inziah tawm hi Lalhruaitluanga Chawngte-in GAC Conference Hall-ah a tlangzarh a ni).

12 October 2015

Khawvela zirlai protest langsar zualte

Khawvelah hian zirlaite lungawi lohna lantirna lian tham tak tak a lo chhuak tawh a, mi tam takin nun an lo chân tawh a ni. Tun hnaiah pawh Mizoram chhungah Chakma thalai leh zirlaite lungawi lohna lantirnaah mi pakhatin nunna a chân a, Manipur state-a Zohnahthlak mi 9-in nunna an chân phahna, MLA leh sawrkar in pawimawh eng emaw zat an hâlna kha zirlai protest a ni bawk a, zirlai thi eng emaw zat an awm nghe nghe a ni. Hetianga zirlaite an thih hian mi a dêng nâ a, buaina pawh a punlun duh hle. Zirlai protest hrang hrang, lar zualte i han thlir teh ang.

Tiananmen Square Protest, China 1989

 May 1968 Protests, France
May ni 3, 1968-ah chuan Sorbonne University-ah zirlai lungawi lohna lantirna nasa tak a lo chhuak a; revolution tenau a ni hawt mai! Heng zirlai lungawi lote hian Nanterre-a University of Paris an khar hmiah a, Sorbonne University zirlaite chuan kawngpuiah kawng an zawh mup mup mai a ni. Zirlai, zirtirtu leh nawrh thlawptute hian France ram education system chhe lutuk te, lehkhathiam hna hmu lo tam lutuk chungchangte chu an tlangaupui ber a ni.

Ni eng emaw zat a liam hnuah pawh buaina a punlun zel a. Paris-a Latin Quarter-ah chuan police leh zirlai 100 chuang teh meuh mai chu an intawng a; zirlai lamin lungin an vawm a, police-in mittui tlakna hlo an hmang thung. Zirna mai bakah France rama politics leh economics dinhmun chhe lutuk avang chuan zirlaite chuan thla khat leh a chenve chhung zet mai lungawi lohna an lantir a, hemi chhung hian mi eng emaw zat an thi a, mi 100 chuangin hliam an tuar bawk.

Hnathawktu zawng zawng zingah mi za zela 22 (22%) zet chu he lungawi lohna lantirnaah an inhmamhnawih bawk a, anni hian an hnathawhnaah concession tam zawk an phût bakah capitalist sawrkar chu thiat turin an nawr a ni. He nawrhna, thisen tam tak chhuak chuan rah tha tak chhuahin, France sawrkar chuan educational reform bill a pass thuai a, hnathawktute dinhmun pawh siamthain hlawh tam zawk a ruahmansak a ni.

German Student Movement, 1968
Kum 1968-a West Germany-a zirlaite lungawi lohna lantir kha, khawvela zirlai protest rapthlakte zinga chhiar tel a ni fo mai. He buaina hi politics thil avanga lo chhuak a ni a; April ni 11-ah an hruaitu pakhat Rudi Dutschke chu fascist mi Josef Bachmann chuan “communist vawk sâwn!” tiin a lu-ah vawi thum ngawt silaiin a kap a; Dutscheke chuan hliam rapthlak tak tuarin, kum 1979 khuaah a thih phah ta a ni.

Hei hian zirlaite a tithinur em em a, Bild chanchinbu phei chuan “buaina siamtute hnawhchhuahna” thu a chhuah hial a. Thalai mi 50,000 zet chu kawtthlerah an pung khawm a, Bild chanchinbu thuchhuah hi an sem darh a ni. Hei hi police-te chuan tuiin nasa takin an phuh a, zirlai mi 180 lai chu an man nghe nghe.

Student Strike of 1970, USA
May ni 4, 1970 khan Ohio-a Kent State University-a zirlai rualkhat chuan President Nixon-a’n Cambodia a rûn chu duh lohna an lantir a, boruak a sosang hle. Ohio National Guard te chuan pung khawm zingah silai an hmet puak a, zirlai 4 thiin pakhat chu ramtuileilovin a awm zui a, 8-in hliam an tuar bawk. Zirlaite thihna hian ram pum a tuam chhuak nghal a, ram chhung hmun tam takah tharum hmanga lungawi lohna lantir a nih laiin, tharum tel lova lungawi lohna lantir tam tak an awm bawk.

Zirlai mi maktaduai chuang zet chu he buainaah hian an inrawlh a, hei vang hian zirna in, high scholl atanga university 450 chuang zet chu khar a ni. Lungawi lohna lantirte hian Reserve Training Officer Corp (ROTC) building tihchhiat tumin bomb hmangin an bei hial. Washington-a sipai camp te an bei a, motor ke tichhiain darthlalang te an vaw keh rem rum a, car an suasam nasa hle. Hei hi zirlai pakhat chuan, zirlai lungawi lohna lantir aia tualchhung buaina a an zawk mah thu a sawi nghe nghe. Hemi hnuah hian Vietnam War thlawptute chuan heng lungawi lohna lantirte hi an bei let leh a, mi tam takin hliam an tuar a ni.

2011-2012 Chilean Student Protests
Chile zirlaite chuan President President Sebastián Piñera-a’n zirna siamthatna tura ruahmanna a siam chu duh lovin kum 2011 khan nasa takin dodalna an nei a. Zirlai sang tel chuan lungawi lohna an lantir a, lungin police an tawng a, police lamin tear gas hmangin hnawh darh an tum bawk a. August thla chhung ringawt pawh khan police mi 90-in hliam an tuar a, zirlai lungawi lohna lantir mi 874 zet man an ni a, dawr tam tak a kâng bawk.

Heng zirlaite hian mipui vantlangte chhawr phak leh tangkaipui tur zirna atana sum tam zawk dah an phut a; kum 1990 hnu lamah Chile ramah university din belh a ni tawh lo hrim hrim a, zirlai an pun zel avangin zirlai tam takin harsatna an tawh phah a, university din belh te chu an thil phût zingah a tel a; mipui mimir intluktlang lo lutuk chu he lungawi lohna bultanna ber nia sawi a ni bawk. May 2011 thleng khan police 500 chuangin hliam an tuar tawh a, zirlai 1800 vel chu man an ni tawh bawk. Zirlai lungawi lohna lantirte hi mi 2,00,000 chuang zet an tling bawk. He thil hian a awh rei hle a, kum 2012 a hawlh kai dawrh a ni.
 
Iran Student Protests, 1999
Reformist newspaper ‘Salam’ khar a nih duh lohna lantirin lungawi lohna lantir mup mup a ni a. Chutih laiin, July ni 8, 1999 khan Iran rama Tehran University zirlai pakhat chu an hostel mutna atangin a tla a. Hetih lai hi boruak sosan lai a nih avangin, he thil thleng hian a ni lo zawngin boruak a tialh zual ta tlat mai!

Zanlai pelh hnu lawkah zirlaite chu thovin buaina a chhuak ta thut a. Police-te nen inbeiin police-te chuan nasa takin tharum an thawh a, an mut pindan an suasam chiam a, tukverh te, khumte chu an tichhia a, kangmei a chhuak zui bawk a. Zirlai thahnem takin hliam an tuar a, campus tlawhtu zirlai pakhat chuan he inbeihna avang hian nunna a chân nghe nghe.

Hemi hnu hian vantlang hmunah zirlaite chu chhuakin an mut pindan beih avang leh zirlaite dikna chanvo humhim duhin lungawi lohna an lantir a, mipui tam takin an thlawp bawk a. Police-te an tairaw tiangin mipui an vaw darh a, rei lo te chhungin mi panga an thih phah a. Hetianga police lam an chet avangin buaina a sosang zel a, ni nga chhung zet chu lungawi lohna lantir chhunzawm a ni.

The Trisakti Shootings, Indonesia, 1998
May ni 12, 1998 khan Indonesia khawpui Jakarta-a Trisakti University-a security forces-te chuan zirlai 4 an kaphlum a, mi 10 chuangin hliam an tuar a ni. Indonesia ram economy dinhmun hniam lutuk avang leh thil dang dang avangin, hemi hma hian he university-a thawkte leh zirlai 6000 zet chuan President Suharto chu bâng turin an lo phût tawh a. Mahse, tharum thawh lova lungawi lohna lantir an ni chungin police-te chuan lo dangin tharum nen an campus chhungah an um lut a, zirlaite chu an kap ta chiam mai a ni.

Hemi hnuah mipui thinrim chuan buaina tichhuakin sawrkar in pawimawh an hâl a, dawr tam tak rawk a ni bawk. President Suharto pawh May ni 21, 1998 khan a bang ta nghe nghe a; zirlaite kahhlum avangin thubuai ziahluh a ni bawk. 

Athens Polytechnic Uprising, Greece, 1973
November 14, 1973-a lungawi lohna an lantir chu tuman an bengkhawn loh avangin, Athens Polytechnic zirlaite chuan an university chhungah inkulhin, radio station atangin Greece mipuite chu sipai rorelna dodala an rorel dan firfiak tak chu do lêta anmahni zawm turin an sawm a. Chu sawmna chu mipui sang tel chuan chhangin, university chhung leh a chhehvelah an pungkhawm a, nun thapin sipai sawrkar duh lohna an lantir ta a ni. 

November ni 17 zing a lo nih chuan tank 25 zet mai chu kawtthlerah a lo lang ta ruau ruau mai le! A kua chu university lam hawiin an han her sauh sauh va, zirlaite chu insaseng tum mah se, an insaseng fel hmain university hma lam gate chu laipuiin a sai ta ulh ulh mai a. Tlanchhiat tum thenkhat chu inchhawng chung atangin sniper-te chuan an lo kap bawk a. Hemi avang hian mi 24 an thi a, mi 100 chuang teh meuh mai chuan hliam an tuar bawk a, 1000 chuang zet chu man an ni bawk. Hemi kum hian sipai rorelna chu pheh thluk niin inthlanna felfai leh zalen tak an nei ta nghe nghe a ni.

Tiananmen Square Protests, China, 1989 
Tiananmen Square Massacre hi khawvel history-a zirlaite protest lar berte zinga mi a ni. April ni 21, 1989 khan Chinese zirlai 1,00,000 zet chuan Tiananmen Square-ah lungawi lohna an lantir a. April ni 26 khan sawrkar chuan zirlaite protest hi ‘buaina chawh chhuah tum vang hrim hrim’-a puhin a dem thu a puang a, zirlaite chuan sawrkar puhna chu phain an ngaihdan pawh sût turin an phût nghal bawk.

Sawrkar thuchhuah hian nghawng a nei lian zui hle a. Zirlaite chuan chaw ngheia lungawi lohna lantirin, zirlai 1000 chuang chuan an thlawp zui a, pawl hrang hrangin an thlawp thu an sawi bawk a, Tiananmen Square-a zirlai lungawi lo kalkhawmte hi mi 5,00,000 an tling chho hial a ni. Sawrkar hotute lu pawh a hai hle a, kar sarih hnu chuan People’s Liberation Army (PLA) chu Tiananmen Square ‘thianfai’ tura order pek an ni ta a ni.

June ni 3, 1989-ah chuan PLA 27th leh 38th division te chuan an hna thawk tanin, tear gas nen zirlaite chu an hnawt darh tan a. PLA-te hi silai hmet puak lo tura hriattir an ni a, a tam zawk chuan silai an keng lo reng a. Zirlai lam hian lungin sipaite hi an lo vawm let nasa hle. Chumi zan chuan sipaite tha tharin ralthuam famkim nen an thawk tha leh a, an ralthuamte hmet puakin tank-in civil mi tam tak an chîl bawk. He thil avang hian mi 100 chuang an thi a ni.

 Tlatelolco Massacre, Mexico, 1968
October 2, 1968 hi Mexico tan chuan ni lungchhiatthlak tawpthang a ni. Mexico ram pum chu kum 1968 Summer Olympic thleng turin a inbuatsaih mup mup a, chumi denchhenin zirlaite chuan lungawi lohna an lantir a; politics avanga lungin tângte chhuah te, university hrang hrangte zalenna zau zawk pekte leh thil dang dangte an phût a.

Zirlai 10,000 zet chu Tlatelolco district-a Plaza de las Tres Culturas-ah an pung khawm a. Tharum thawhna tel lova lungawi lohna an lantir laiin, sawrkar chuan chu hmunah chuan sipai motor a tir lut ta thut mai a. Van lam hawiin êng an kap chhuak a, mipui pungkhawm hnawh darh tumin silai an hmet puak bawk a. Mahse, silaimu leng vel tawngin zirlai pawisawilo mi 44-in nunna an chân a, mitthi zat hi 200-300 vel nia sawi an awm bawk. Mi 1345 man an ni.

Mi tam tak chu a bul vel inah te an biru a, mahse, sipaite chuan in hrang hrang dapin chungho chu an man hmiah hmiah a, he protest-a inhnamhnawih miah lo pawh man an nei nual nia sawi a ni.

Soweto Uprising, South Africa, 1976
Kum 1974 khan South African sawrkara Education department chuan school-ah Afrikaans tawng hman vek tur tiin thupek a chhuah a. Mihang zingah English leh Bantu tawng a lar chak em avanga ti an ni awm e. Mahse, African zirtirtu tam tak chuan Afrikaans tawng an thiam lo va, Afrikaans tawng hmang zirlaite result chuan a chhiat phah ta letling zawk a. Chu chuan nghawng tha lo tak a nei ta a ni.

June ni 16, 1976-ah chuan zirlai 1000 rual chuan an classroom chhuahsanin, Soweto Students’ Representative Council’s (SSRC) Action Committee kaihhruaina hnuaiah Orlando Stadium panin kawng an zawh a. Chutia tharum thawhna tel miah lova kawng an zawh lai chuan police pakhat chuan a silai a hmet puak ta hlauh mai! Zirlai kawngzawhte chu an chiai ta nuai nuai a, buaina a thlen phah ta. Zirlaite chuan police lam chu lungin an tawng a, police lam pawhin zirlaite hnawh darh nana silai hmet puakin, zirlai 2 an thi a, mi 100 chuangin hliam an tuar a ni.

June ni 17 a lo nih meuh chuan sipai ralthuam keng mi 1,500 chu Soweto kawtthlerah kein an lo kal ta thup thup a, sipai helicopter a rawn vir vut vut bawk a. Sipai chakna hmanga zirlai kalkhawmte an han beih meuh chuan mitthi zat chu 176 a ni a, mahse, chu chu sawrkar official thu puan mai a ni, mi 600 chuang thiin an ngai. Kum 14 zet a ral hnuah, hemi avanga lungin tâng zawng zawngte chu Nelson Mandela chuan a chhuah ta vek a ni.

10 October 2015

Mizo thalaite leh chhelna

Hman kum lawk, kum 2005 khan khawvela intlansiakna marathon aia intlansiakna turu leh hautak zawk, ultramarathon an tihah chuan American mi Dean Karnazes chuan darkar 80 leh minute 44 chhung mu miah lovin kilometre 560 a tlan chhuak a, Aizawl atanga Guwahati ai pawhin a la thui zawk a nih chu! Hemi hma kum 2002 khan khawvel chhim tawp (South Pole), celcius –25o-a vawt chu vur rama bun chi pheikhawk bun miah lovin a lo tlan tawh a, kum 2004 khan hmun lum lutuk mai, celsius 49o-a lum Death Valley intlansiakah kilometre 217 tlanin pakhatna a lo ni tawh bawk a ni.

A chanchin hria apiang chuan Karnazes-a thil  tih chu mak an ti a, chutianga thil ropui a tih theih chhan an han zawh chuan ani chuan, “Min zirtirtuin, ‘thil harsa hmachhawn turin pen chhuak  la, harsa lehzual hmachhawn turin hlen rawh’ tiin min fuih thin a, chu chu hun harsa leh khirh ka tawh apiangin ka infuihna leh intihchak nan ka hmang thin a ni,” tiin a lo chhang a. He a thurolum rorum tak hi a vawng tlat a, khawvela hmun lum leh ro hmingthang Death Valley leh South Pole vawt lutukah te pawh chhel takin a tlan zel a, kum 40 chuang awrha upa, ft 5.8-a sang ve mai khan khawvel mite ngaihsan a hlawh ta em em a ni.

Keini, Mizo thalaite hian hetiang hi kan peih ve ang em le? Kan theih leh theih loh chu thuhran ni se, tam tak chuan a tum pawh kan tum buai peih kher lo vang. Kan boruakin 35o C a kai dek dek tawh chuan fan hnuaiah kawr phelh huangin kan thu mu thlandai a, chet pawh chechang peih lovin khawlum thu mawlh chu kan la hrilhfak thin a ni lo’m ni khah? Thla a han sik dek dek a, blanket hnuaiah mut-thuam lum ber ber inbelin, ‘a vaw-haw-haw-hawt’ kan la ti khur bauh bauh thin ti rawh u?! Chutiang mi tan chuan –25oC-a vawt leh 49oC-a lum hnuaia infiamna beih chu a tina tin chhin ringawt pawh a hahthlak nghal a ni. Mahse, anni chuan an thei tlat! An chhel tlat atin ni.

Kan Zoram boruak nuam tawk lutuk phei chu phun khum atan chuan a uiawm zawk a, hmun dangte nena teh chuan lum lua leh vawt lua ni pawhin a lang lo. Mahse, kan ngaihtuahnaah a nawmna aiin a hrehawmna a lian zawk tlat a; he khua hnuaiah hian kan nu leh pa, kan pi leh pute chuan kum 300 vel lai chu chhel takin ram hna an lo thawk tawh. Ei an lo zawng tawh a, vawiin Zoram thleng turin ke an lo pen tawh a ni. Mizo thalaite zingah hian khaw awmdan avang ringawta hna thulh phah tam tak an awm ngei ang. Eng pawh ni se, nipui lai thla thum vel lek chhung leh, thlasik thla thum vel lek chhung chu khawlum leh vawt vanga i phun loh khan chhel i inzir nghal pang.

Hlawhtlinna hi reilotea hmuh kan tum thin a, hlawhtling tura paltlang ngai thilte paltlang turin kan chhel tawk lo tlat thin. Ngaihtuah chiang mah teh, hlawhtlinna kalkawnga hrehawm tawrh tur lo awm thin hi a hun chhung a rei ngai lo.  Sunhlu phak leh kha tak ei hnuah kan tui in a thlum tui em em thin ang hian, harsatna lian tak paltlang hnua hlawhtlinna kan hmuh hi a ropui bik a, a par chhuah a mawi a, a zu a thlum tui bik a ni. Mi hlawhtling tam tak, an lehkha zir laia harsatna lian tak tak tawk thinte hian, an hlawhtlin hnua an chhuan ber leh sawi nuam an tih ber chu, an lehkha zir laia harsatna an tawh leh, chumi paltlang tura an beihna a ni tlat. Chuvangin, tuna harsatna i tawh kha, nakina i titi tui ber a la ni dawn a, chumi tur chuan eng ang harsatna pawh tawk la, chhel taka tuar zel turin i rilru tipaukhauh ang che.

Marathon kan sawi ang chiah hian khawvel hi intlansiakna khawvel a ni tawh a, a taima leh teirei peih leh, a chhel apiang chu a tawpa lawmman hmu tam an ni mek zel. Khawvel company lian hrang hrang bultantute hi thalai an ni a, tuna khawvel khaidingtute leh khawvel hmasawnna tura beitute hi thalai an ni. Internet lamah pawh — application hrang hrang siama social networking lama hmahruaitu chu mi ram thalaite an ni tlat. Mizo thalaite’n hun tam tak, uiawm taka kan khawhralna facebook leh WhatsApp atang hian mi ram thalai Mark Zuckerberg leh a thiante chuan hlawkna an la lut ruih ruih thung. Heng thila kan hun kan khawhral tam poh leh anni chu an hlawk ting mai a nih âwm hi maw. Thalai theuh theuh kan va inthlau si em! Hawh u, he intlansiakna khawvelah hian tlan turin inbuatsaih ve tawh ila, mi ram thalaite lehpel thei turin harsatna lo thlengte pawh chhel takin i hmachhawn ve tawh ang u hmiang.

Hlawhchham kan tih hi dawhtheihna tlakchham vang leh chhelna neih loh vang a ni fo. Mi ropui kan tihte hian hlawhchham kan intihna tam tak hi hlawhchhamah an ngai lo va, hlawhtlinna kalkawngah an ngai zawk a ni. Miin hna a thawha harsatnate chhel taka a tawrh zel tlat chuan eng vangin nge a hlawhchham tehlul ang ni? Chutiang thil a thleng a nih ngat chuan Siamtu meuh pawh a principle-ah a fail tihna a ni ang; mahse, chutiang chu a thleng ngai dawn lo. Indopui pahnihna lai vela Hungary rama an idol chu indo thiam leh ral that tam a ni lo, tlangval pakhat, ramtuileilo Karoly Takacs kha a ni.

Hepa hi sipai a ni a, pistol kah thiam em em mai a ni. Kum 1940 Tokyo Olympic Games lo thleng turah Hungary ram innghahna a ni a, a ram tana gold medal hawn ngei turah an ngai. Mahse, vanduaithlak takin hemi hma kum hian grenade a keng puak palh hlauh mai a, a silai kah thiamna lam, a kut dinglam chu engtikah mah a pangngai tawh dawn lo! Mahse, hlawhtlinna kawng a zawhnaa he harsatna leh vanduaina lo thleng hi hepa, kum 29 mi lek hian a tudai tlat a ni. A vanduaina hi tumruh nan a hmang a, chhel takin a kut veilamin silai kah a zir leh tauh tauh a; kum 1939-a Hungarian National Pistol Shooting Championship-ah a hmel a rawn lang hlawl a. A chanchin hretu mipuite chuan a vanduaina tawh chu an tawrhpui thu leh, chu intihsiak en tura a kal thei chu an lawmpui thu an hrilh liam liam a. Mahse, ani chuan heti hian a lo chhang — “He hmunah hian entu ni turin ka lo kal lo va, intihsiak turin ka lo kal a ni,” tiin! A thiam ber niin gold medal a hawn zui nghe nghe a. A tum a ruh a, a thawkrim a, a chhel a ni! Indopui lo thleng avangin Olympic lo awm tur chu tum hnih ngawt thulh a ni a, kum 1948 London Olympic-ah telin gold medal a dawng a, world record a siam. Kum 1952 Helsinki Olympic-ah tel lehin gold medal a dawng leh! Hei hi kan sawi chhel lawmman chu a ni. Hungarian mipuite chuan an theihnghilh tawh ngai lo vang.

Hetih hun lai vek hian Mizote pawhin chhel hmingthang kan nei ve alawm! Mizo nu hrin ngei Kaphleia khan kum 1937 khan TB natna a vei a, hetih lai hian kum 27 mi lek a ni. Natna khirh tak tawkin, hrehawm tam tak tuar chungin, kum 1939 khan khatih laia natna tihdam theih loha ngaih, tunlaia cancer kan hlauh tluk zeta an hlauh TB vei chungin ‘Thlirtu’ essay kha a ziak a; thla 6 chhung ngawt a ziak a ni. Mizo zinga essay puitling ziak hmasa ber a ni a, tun thlengin he essay hi Mizoram University-ah MA zirlaite’n an zir mek a nih hi. Hetiang dinhmuna ding tur hian Kaphleia kha a chhel a ni! Kum thum chhung ngawt TB natna avangin khung hran a ni a, vui ahnekin, “...kan chunga thil thleng tur kan hriat lawk theih lohna hi Pathian thilpek ropui a ni,” a la ti thei nia. A ropui ngawt mai. A natna kha chhel takin a tuar a, tuar chhuak lo mah se, Mizo literature a awm chhung chuan Kaphleia hian Zofate zingah hriat a hlawh kumkhua tawh dawn a ni. Chu tluka chhelna lawmman ropui a awm chuang em ni?

Natna kan tawh te, harsatna kan tawhte hian Mizo thalaite hi engtiang chiaha chhel nge kan nih le? Damdawi tha ber ber eiin damdawiinah leh mahni inah kan inenkawl a, kan hna pawimawh zawng zawng kan kalsan a, kan nat hun chhung chu hrehawm hlirin kan hmang tluan zak mai thin. Chuti ni lovin, Kaphleia angin natna pawh chhel tak lehna tangkai takin kan hmang tangkai ve thei dawn lo’m ni? Kan nat hun chhungin nat loh huna awm dan tur, nat hma aia ropui zawka din chhuah leh dan tur ngaihtuahin intipaukhauh ve ila. Karoly leh Kaphleia te kha mihring ve tho an ni; robot an ni lo va, alien an ni hek lo. I boruak hîp kha nunna atan an hmang ve tho va, i tui in tho kha dangro hnàwn nan an hmang. I vaivut pal khuk sat sat thin chunga chêng ve tho an ni. Anni chu an chhel a, an ti thei mai.

Kan thiltihna kawngah hian harsatna te, natna te, hrehawmna te hi chu lo thleng tur a ni alawm. Nimahsela, engati nge Mizo thalaite hian kan nun leh kan thiltiha harsatna lo thleng thin hi ngaiah kan neih theih tlat loh? Eng ang harsatna pawh lo thleng se, kan insal behtir tur a ni ngai lo. I thuhnuaiah dah la, a tul chuan chhel takin tuar fan fan rawh. Kan Pathian thu ngei pawhin, “Engmah tlachham lova in famkim a, in puma in him theih nan chhelna chuan thawk famkim rawh se” (Jacoba 1:4) a lo tih kha. Siamtu meuh pawhin hlawhtlinna tawng turin chhel a tulzia min hrilh lawm lawm a nih hi.

A tawp berah chuan hengte hi inzawt chiah ila. Biak Inah — mutchhuak do zo tur leh thusawi ninawm tak ngaithla zo thei turin i chhel tawk em? Zirna inah — zirlai hriatthiam har tak, i thiam hmaa zir reng thei turin i chhel tawk em? Hnathawhna hmunah — i thlai chînte’n rah an chhuah hma leh, i buh tuhte’n vui an chhuah hmaa a sur a sa hnuaia hna thawk reng turin i chhel tawk em? Eizawnnaah — i dawr siama hlawkna i hmuh hmaa hlohva kal char char turin i chhel tawk em? Infiamnaah — hnehna i chan hmaa vawi tam tak chak lo zawk ni ngam turin i chhel tawk em? Inthlannaah — Abraham Lincoln angin tling tura vawi tam tak tlak inhuam thei tur khawpin i chhel tawk em? Heng zawhna te hi ‘aw’ tia i chhan vek theih hunah i hlawhtlinna kan la lawm dawn nia.

Mizo thalai, chhelna chhehchhawl rawh; hlawk taka hlawhtling ngei turin.

(He thu hi September ni 13, 2015 zanah All India Radio-ah tihchhuah a ni a, MSU General Conference 2015 puala souvenir an siam 'KULVA'-ah tihchhuah a ni tawh bawk).

09 October 2015

Mary Kay Cosmetics Inc. dintu Mary Kay

Incheina leh lampang siamchhuaktu Company Mary Kay Cosmetics Inc. hi kan hre țheuh àwm e. Keini Mizote phei chu incheina ngaina tak kan nih avângin a hming kan hre bel viau tawhin a rinawm.

Mary Kay hi American hmeichhe sumdâwng lâr tak mai a ni a. A company, Mary Kay Cosmetics Inc. pawh hi khawvêlah pawh incheina lam (cosmetics) siamchhuaktu company lâr berte zînga mi a ni nghe nghe a. Amaherawhchu, hetiang dinhmun thleng tur hian Mary Kay hian harsatna tam tak a paltlang ve tho va, thawhrimna leh tumruhna nen mahni inringtâwk tak chunga beiṭțâng țânga hetiang dinhmun thleng ta a ni a, awlsam taka hlawhtling a ni bîk hauh lo.

Mary Kay hi a hming diktak chu Mary Kathlyn Wagner a ni a, Edward Alexander leh Lula Vember Wagner te fa naupang ber niin May ni 12, 1918 khan Hotwell, Texas-ah  piang a. Sikul a kal țan hnuin a pa hriselna a țha lo va, a nu chuan restaurant-ah nitin darkar 14 chhung hna a thawk a; chu chu an chhungkaw intunnunna ber a ni. Chutih laiin Mary Kay chuan a theih ang anga in lam hna lo thawkin eirawng a lo bawl a, a pa damlo chu theihtawpin, duat leh hmangaih tak chungin a lo enkawl țhin a ni.

An sikul lamah pawh Mary Kay hi thiam thei tak leh hma sàwn chak tak mai a ni a. Debate leh thusawi tih angreng vêl pawh a thiam hle a, an sikulah pawh an zirtirtute lawm leh fak a hlawh hle nghe nghe a. Mi tumruh tak leh mahni inrintâwkna ngah tak a ni a, chu chuan tûn dinhmunah a hlângkai tih loh rual a ni lo.

High School a zir zawh hnu chuan an chhûngkaw khawsak a harsat tâk ém avângin college a chhunzawm thei ta lo va. Mahse, mi tumruh tak mai a nih avângin a beidawng duh mai bîk hauh lo. Kum 17 mi a nihin Ben Rogers nen an innei a, fapa pahnih leh fanu pakhat an nei. Pasal a neih hnuah pawh in tinah lehkhabu a zuar kual țhin a, kum 27 a tlin meuh chuan a college kalna tur a tuak ngah ta a. Tichuan, fate pawh a neih hnuin lehkha a zir chhunzawm leh ta a. Mahse, vânduaithlâk takin a pasal sipai, chawlh hmanga rawn haw chuan ințhen rawn rawtin an ințhen ta a.

Hetia an ințhen hnu pawhin lehkha a zir chhunzawm zêl tho va, college kal pahin Stanley Home Products-te thil siam chhuah zawrh hna a thawk pah reng a. Tichuan, University of Houston-ah a zir chhuak ta a ni.

A hnathawhna chungcháng hi tihian People Magazine hnênah a sawi nghe nghe a. "Branch Manager hnuaia ka thawh chhûng khân amah (branch manager)-ah thil tam tak zir tur hmuin remhriatna leh thil tihna réng rênga fîmkhur dân min kawhhmuh a, chu chuan ka khawvêl a siam a ni,” a ti hial a ni.

Hmeichhia a ni na vang vangin hmun hran hranah lehkhabu zuarin țhahnem a ngai hle țhîn a. A hnuah lehkhabu zawrh chu bànsana sumdàwnna lampang khawih a rilrûk ta a. A hna chu a bànsan a, hmeichhiate'na an hnathawhna hmuna harsatna an tawh chungcháng chu a ziak ta bawk a. Chutih rual chuan sumdâwngmi hlawhtling tak nih a tum tlat bawk a. Chumi chungchángah chuan puitu tur a mamawh hle a. Hmai lampang enkawlna chi hrang hrangte chu a siam chhuak a, chu chu zau zâwka hralh chhuah rilrûkin company țhenkhat chu phungbâwmah a sawm a, mahse, chung Avon leh company dangte chuan thawhpui duh lovin a thilsiamte pawh an zawrhsak duh lo a ni.

Kum 1963 nipui lai khan a pasal thar George Arthur Hallenbeck nen Mary Kay Cosmetics Inc. bulțan turin ruahmanna a siam dun a. Thla khat hnu lawkah vanduaithlak takin a pasal chuan a boralsan a. Beidawng duh lova bei zelin, a fapate pahnih, Ben Rogers Jr. leh tuna a company khaidingtu ni mek, Richard Rogers te nen $ 5000 nen chauh bul țanin, Mary Kay Cosmetics Inc. chu September ni 13, 1963, zirtawpni khan din a lo ni ta a ni.

Chu a company chuan Dallas, Texas chu hmunpui berah hmangin incheina leh taksa lam enkawlna chi hrang hrang a siam chhuahte chu hmun hran hranah a zuar kual ta țhîn a ni. Chung an thil siam chhuah chi hrang hrangte chu hmai vun enkawlna te, sam colour-na chi hrang hrang te, tin hnawih te, taksa (body) tâna țha cream chi hrang hrang te, nizung laka invenna chi te, mipa tân bîka siam vun enkawlna te, rimtui (perfume) chi hrang hrang bâkah vun leh taksa tâna chaw țha siam thei thil chi hrang hrang 200 chuang ngawt a siam chhuak a. Mahse, chung thilte siam nan chuan thil nung lampang chi réng rêng a hmang lo thung a, hei hian a hming a tițha hle nghe nghe a ni. Hemi avâng hian a company chuan a thil siam chhuahna kawnga mite tâna environment lama entawn theih tur țha tak a hnutchhiah avângin United Nations Environment Programme (UNEP) ațangin chawimawina (award) a dawng nghe nghe a ni.

Tunah hian khawvel ram hrang hrang 37-ah branch tam tak a nei a. United States-a cosmetics lam thil siam chhuaktu lian ber a ni bawk a. A hmaa amah pui duh lotu, Avon pawhin a tluk ta lo hle. Kum tinin an thil siam chhuah dollar tluklehdingawn 3 man zet chu an hralh chhuak chur chur a. A company hnuaia hnathawktu zawng zawng pawh mi 30,00,000 ngawt niin mi tam tak eizawnna a siam mêk a ni. Hmeichhe chawikàn lampang a vei ém êm a, hmeichhia a tam thei ang ber a company hmanga eizawnna siamsak chu a duhthusàm ber a ni. Hemi vâng ni hmiang, a company-a thawkte zînga a tam zâwk chu hmeichhia an ni a, hmeichhe tam takin dinchhuah phah tawhin a țhenin eizawn nan an hmang mek a. Tûnah hian a kaihhruaina hnuaiah a fapa chu company president a ni mêk a ni.

Chutiang khawp chuan hlawhtlingin mite tân malsâwmna mah ni se, lo ertu leh sawisèltu chu a tawng lo bîk hauh lo. Mi țhenkhat phei chuan a company chu rindân leh ngaihdân, thil awm thei tak tak lo mitthlâ chung leh suangtuahna mai maia hna thawk ni-ah an ngai rèng a ni. Khawimu pawh hi amah maia thlâwka a taksa lian tak zo tur chuan a thla a tel a ngai a, chumi hmang chuan a thlâwk mai țhîn. A hlawhtlinna pawh hi chumi hmang chuan a tehkhin țhîn a ni. "Hmeichhe țhenkhatina an hriat miah loh an hriat țûl nia ka hriat chu, dinhmun sáng berah an inhlângkai thei a, mahse, chumi tur chuan an thawh a ngai a ni,” a ti țhîn. Tin, hmeichhiate hi an tum tak tak chuan mi ropui leh hlawhtling tak an ni thei tih hrilh hriat hi a tum ber a nih thu a sawi țhîn bawk. Hemi vâng pawh a ni thei ngei ang, Mary Kay Cosmetics a thawk hmeichhe tam takte'na an thil siam chhuah ațanga dollar maktaduai tam tak an thawh chhuah rèng ni.

Mary Kay hian hmeichhiate tâna hna a thawh țhat avâng leh a hlawhtlinna avângin lawmman chi hrang hrang tam tak a dawng a. A hnathawkte hnênah sum chang ni lo, finna leh hriatna mai bâkah taimakna leh tumruhna a tuh a. Midang țanpui duhna thinlung leh khawngaihna chî chu amah ngeiin tuhin chu chu a puitlin thlengin uluk takin a châwm chho a ni. Kumtinin a hnathawkte hnênah lawmman lunghlu chi hrang hrang leh tlereuh man to tak takte a pêk țhîn bâkah five star hotel-ah te intihhlimna a neihpui țhîn a. Chutiang chuan a hnuaia hnathawkte tân hamțhatna tam tak a siam a ni. Hmeichhe thluak hmanga hma sâwn chho zêlin hmeichhiate tâna țangkai leh pawimawh tam tak an siam chhuak bawk.

Sumdàwnna ngawr ngawr bâkah Mary Kay hian țanpui ngaite a țanpui nasa hle. Mary Kay Ash Center for Cancer Immunotherapy pawh dinin, he a society hian cancer veite enkawlna turin Komen Foundation leh American Cancer Society kaltlangin sum tam tak a pe țhîn a. He a society pawh hi St. Paul Medical Center Mobile Cancer Screening Unit hriatreng nan a hlân nghe nghe bawk.

Hemi piah lamah lehkhabu engemaw zat a ziak a. A autobiography 'Mary Kay' chu copy maktaduai chuang teh meuh mai hralh a ni a, țawng hrang hranga lehlin a ni bawk. A lehkhabu pahnihna leh pathumna 'Miracles Happen' leh ‘You Can Have It All’ chu August 1995-ah tihchhuah niin a hun laia lehkhabu hralh țhat berte zing ami a ni.

Award leh chawimawina chi hrang hrang a dawn bâkah amah hriatrengna tur tam tak din a ni a. Țum engemaw zat ‘Women of the Year’ atana thlan a ni bawk. Hetih laia US President, Ronald Reagan chuan chawimawina a pêk bâkah National Federation of Independent Business Report-ah chuan a sumdàwn dân kalhmang tarlan a ni bawk. The Mary Kay Museum chu din niin kum 30 chuang hlawhtling taka a sumdàwnna hriatreng nana hlan a ni bawk.

Mary Kay hian taima tak leh tumruh taka hnathawkte hi a ngaisâng ém êm a, an hlawhtlin ngei ngei pawh a ring tlat a, tu emawina ei leh bâr zawn kawnga hlawhtlin a tum tlat chuan zalèn takin chumi hmanga sumdàwnna a din theih pawh a ring tlat a ni.

“Tih theih i inrin chuan i ti thei ang a; tih theih i inrin loh erawh chuan i ti thei ngai lo vang,” tih hi a vawng tlat a, a innghahna ber pawh a ni nghe nghe. Pathian țih mi tak a ni a, "God first, family second, career third" tih hi a thupui ber a ni. Mary Kay hi hmeichhe tân thawkin thawhhlâwk hle mah se, mipate tân pawh entawntlâk tak a ni. A hlawhtlinna zawng zawng hi amah mai ni lovin, midangte'n hlawhtlin nan an lo hmang bawk a ni.

Mary Kay Ash hian kum 1996 ațang khan stroke natna a nei țan a, a nat ațanga kum 5, November ni 22, 2001 khan kum 83 mi niin a boral a, Dallas-a Sparkman-Hillcrest Memorial Cemetery-ah phum a  ni. A thih lai hian a company chuan khawvel ram hrang hrang 37-ah hnathawktu mi 8,00,000 neiin, company kum khat sum lakluh pawh dollar maktaduai 200 a tling. A thih hnu hian a fapa Richard Rogers chu CEO a ni chho va, Mary Kay Cosmetics Inc. chu a rawn khaiding chho ta zel a ni.

04 October 2015

Pa, engtin nge i tih theih?

Pa, engtin nge i tih theih? Kum 40 chuang zet chu lo neiin ei i zawng a, biangah thlan tui luang zawih zawihin hna i thawk a. Vawiin anga khaw lum em em ni-ah hna i thawk a, zingkar khaw vawh em em lai pawhin i țhulh chuang lo. Kum khata ni 365 awmah ni 250 chu hna i thawkin ka ring; i chhelna neih zatve tal nei ni ila chuan, rim tak leh hah taka i thawh a ngai tawh lo ni mai tur. Pa, engtin nge i tih theih?

Pa, engtin nge i tih theih? Hna awlsam leh hlawk zawk i neih theih nan te, i retheihna ata khai chhuak tur chein roreltute'n ruahmanna an siam țhin a. A hriate sawi danin, chung ruahmannate chuan i hnen an thlen phak loh chang a awm țhin. Mahse, nang chu ngawih reng a; phur takin lo hna chu i thawk zel mai si. Tumruhna i neih zatve tal nei ni ila chuan, rim tak leh hah taka i thawh a ngai tawh lo ni mai tur. Pa, engtin nge i tih theih?

Pa, engtin nge i tih theih? Innghahna tlak lo tak fapa i nei a. Beiseina sang tak nen min enkawl seilian a, engtik lai pawhin ka lakah rinna i nghat a. Thui takin ka hma lam hun i lo thlir țhin. I fapa hi bana kaih rual lek a nih ațanga tun thleng hian, tawp lovin ka chungah beiseina leh rinna i nghat tlat si. I beiseina neih zatve tal nei ni ila chuan, rim tak leh hah taka i thawh a ngai tawh lo ni mai tur. Pa, engtin nge i tih theih?

Pa, engtin nge i tih theih? Kum 25 chhung zet chu nitin, thlatin kumtin ka hmel i hmu țhin a; mi nin tak aruangin hmanni lawka i fahrin ang maiin min hmangaih em em reng si. Han kal bah chang i neih lai pawhin, tute emaw pa ang maia thinrim inhrikthlak nana nupui fanaute kaltir mai lovin tun thlengin i âng chhungah min la chêntir reng si. I hmangaihna neih zatve tal nei ni ila chuan, rim tak leh hah taka i thawh a ngai tawh lo ni mai tur. Pa, engtin nge i tih theih?

Pa, engtin nge i tih theih? Kum 20 chuang zet chhia leh țha ka hriat hnu hian, mi pawi i sawi ka va hre ngai lo em! Mite chuan an sitin an itsik che a, an sêl chang che pawhin i ngawi reng țhin. Kohhran leh khawtlang pawhin hman tlâka an ngaih tawh loh i ni a; i nun kawng chhukchhovah kham leh suar, harsatna leh beidawnna tur i van ngah em! Mahse, nang chuan mi pawi i sawi ngai lo. I insumtheihna neih zatve tal nei ni ila chuan, rim tak leh hah taka i thawh a ngai tawh lo ni mai tur. Pa, engtin nge i tih theih?