19 March 2016

Aw Zoram, harh rawh; harh lul rawh!

T. Zorampela hla phuah ‘Duhaisam (Zoram ngaih hla)’ hi chuan ka nâk a zen thlawt a ni!

[Ngaithla duh tan YouTube-ah]

Chhaktiang kawlrawnah hian leng mah ila,
I sakhming sawi reng kan bang thei si lo,
Ka pian ka seilenna ram tiin,
Dawn lungrukah nghilhni i awm thei lo.

Hmun danga awm, a bikin Burma rama kan unau, Mizo em emte’na Mizoram an ngaihzia hi aw… An awmna atangin anmahni chawr chhuahna tiin chhuang em emin an sawi thin a, a chanchin an ngaihven a, an sawi thin. Programme leh thil dang dang an buatsaih pawhin Kawl zaithiam leh Kawl fiamthu thiam an sawm ngai lo, Mizo zaithiam te, Mizo fiamthu thiamte an rawn sawm vang vang thin. Mizoram-a kalna remchang an zawng reng thin a, zaithiam leh midang dang pawhin hun remchang an hmuh chuan an hna dang kalsanin Mizoram an rawn pan thin; mahse, kan lo hmusit si.

Aw, Zoram ka ngai em a che.
Nang lo chuan lawm a kim thei lo,
Dar ang tawn leh ni her chhuak thuai se,
Thinlai damten len ve maw ka nuam e.

Zoram hi an ngai ngawih ngawih a ni. He a thunawn hian Pu Rosangliana ‘Zoram Ngaih Hla’ min hriatchhuahtir ziah lehnghal. Keini a ram chhunga awm zawkte hian Zoram nawmzia leh thlakhlelhawmzia hi kan hrethiam si lo va, hmun dang daiha kan unau awmte’n Zoram hlutzia hriain an rawn au vawn vawn zawk zawk thin a; mahse, kan lo hmusit si.

Kan ram kan hnam lo san zelna turin,
Kan nun kan neih kan chakna zawng hlanin,
Lungngaih mangan buaina let zel te,
I tan hlimten ka lo dodai zel thin.

Mizoram-ah an khawsa lo, mahse, Mizo an ni. He an nihnaah hian an chiang em em a, Mizo an nih avangin Mizote chenna Mizoram hi an ramah an pawm hmiah mai a ni. Kan thiam an theih an finna zawng zawngin Mizoram an chawimawi a, Mizoram nawmzia te hla-ah an chawi a, an phuah a, khawvel hriatah an puang chhuak thin. Mzo an nihna kawnga harsatna an tawh pawhin ram leh hnam tan tiin chhel takin an tuar a, an dodai thin. Kan ram leh hnam hmasawn nan theihtawp an chhuah a, hmun hrang hranga an inzarpharhna hmunah pawh ‘MIZO’ chu an tilang thin a, thu leh hlaah an chawi kur ngiai nguai thin; mahse, kan lo hmusit si.

Mahse, vangkhua leta fan leh ni chuan,
I chhunga lungduh unaufa leng zawngten,
Khawchhak mi tia hming min selin,
Sirah damten puan ang min lo hnawl e.

He hla chang hian min tihrehawm ngawih ngawih a; he hlaa ‘chang sakei’ ka ti hial, mahse dawt a ni hauh si lo. ‘Kan ram’ tia an lo chhuan ve ngawih ngawih thin tlawha an lo ‘zin’ chang hian a chhunga chengte hian hmuhsitna kawng hrang hrangin kan lo lantir a. Mizo kan ti duh lo, BURMA MI kan ti thin. He kan ram hi an intineitu em em a, an lo kal chang pawhin ‘zin’ an ti lo va, ‘let’ an inti hial a ni. Mahse, keini chuan, kan unaute hi khawchhak thil hrim hrim huat phah nan kan hmang ta zawk hlauh si. Aw Zoram, harh lul rawh! Kan ram kan hnam chawisangtute hian min zahpui lo. Mahse, keini zawk erawh chu Burma thil fak leh chawimawi te, Burma thil neih te, Burma hming sawi hrim hrim pawhin ‘I va Burma ve!’ kan inti mai thin. Zoram ngaia rumte hian Zoram hi an thlahlel ngawih ngawih a, kan lo hmusit chung chung pawhin hun remchang an neih chuan an rawn tlawh hram hram thin; mahse, kan lo hmusit si.

Aw, a na tuar thiam zawng a har,
Hrilh ka hai, lunglam ka lo vai,
I tan ka tuarna leh hlim ni te,
Zantiang tawnmang mawl mai an chang zo ta.

Kan hmuhsitna thil tih leh tawngkam zozaite hi an hre ve tho, an hai bik lo. Hrehawm ti takin an tuar tlawk tlawk thin. Zoram leh hnam tana an tawrhna leh thawhna zawng zawngte hi kan hmuh hmaih lui a, kan hre duh si lo. An tan chuan a na thlawt a ni. An ram ngeia an lo let leh chang hian hrilhhai leh zak, lungngaiin kan lo siam thin a nih si hi. Ngaihtuah teh, a nâ asin. Zalen leh ngaihngam taka len ve an châk a, Mizoram-a an awm loh lai, Burma-a an khawsak lai takngial pawhin tawngkam na tak takin kan umzui tawk tawk thin. Anni erawh chuan Zoram ngaih an bang chuang lo va, an thinlung hi MIZORAM a la ni tho tho thin; mahse, kan lo hmusit si.

Ramtin kiltina Zofate zawng hian,
Suihlung ruala thinlung hmunkhat puin,
Hmangaihnaa insuihkhawm zel hi,
Kei ka lungkham leh DUHAISAM a ni.

Hnama chiang chu kan hmuhsit Burma-a Mizo awmte hi an ni. Mizoram-a Mizo awmte zingah hnama chiang hi an va tam lo em! Tunge mahni unaute hmusit ngai? Kan unaute chu an chan a chhiat em em lai te, mangang leh hrehawma an rum laite hian kan tanpui zawk tur a ni lo’m ni? Khawvel danah foreigner an ni a ni mai thei, kan thinlungah erawh unau kan ni a, foreigner a awm lo. Mahse, keini zawng khawvel mi kan ni si a, inpumkhatna tichhetu zawkah kan la tang zawk zel a. Chuti chung chuan, thu leh hla hmangin inpumkhatna thu an la rawn au chhuahpui tawk tawk a, Zoram tana an duhthusamte chu an rawn puang chhuak thin a; mahse, kan lo hmusit si.

Aw Zoram, harh rawh; harh lul rawh!
(misual.com-ah May ni 4, 2013 khan ka post tawh).

09 March 2016

Ngaihdam dil rawh se!

Dustin Lalkulhpuia hi Mizoram University-a kan zirpui, kum 2013-2015 batch English department-a Gold Medalist a ni. Literature-a tui tak, sportswriter ni bawk a ni a, zofooty.com-a an puipate zinga mi a ni. Tunah hian MZU English department-ah M.Phil a bei mek. Thian inkawmngeih tak kan ni a, kan fiamthu a sang narawh e. Kum 2014 khan Mizoram University-ah Literature Club kan dinho nghe nghe.

Tun hnai, Chapchar Kût 2016 vuakvetah hian internet khawvelah inhnialna a tam a; model pakhatin a zahmawh khuh nana thangchhuah diar vêta thla a lak vang leh, tleirawl tê pakhat thangchhuah kawr hain jeans kekawr tet haa thla a lak chungchang a ni ber. He thlalak pahnih hian inhnialna a chawk chhuak nasa a, 'ngaihdam dil rawh se' ti leh, 'ngaihdam dil a ngai lo ve' ti an tam hle. A kuthlei zualin thlalak an lo siam danglam bawk a. Tunlai Mizote facebook titi a tling.

Chumi denchhen deuhvin mi thenkhatin 'ngaihdam dil rawh se' tiin thil dang a behbawmah leh behbawm kher lovah thu an post nual a, nuihzatthlak tak tak leh hlimawm tak tak a ni a, man lo fe fea lo comment lah an tam thin. Mahnia chhiar nuih kur kur a awl hle. Kei pawh uan nuam tih takah, March ni 8, thawhlehni zing lam dar 2:02 khan facebook-a group lar ve tak pakhat 'ZORAM POLITICS'-ah chuan kan thianpa Dustin-a kahna thu ka post a, sap pakhat thla a lakpuina ka post tel a, a thu chu hei hi a ni:

'Hepa hian ngaihdam dil rawh se. Ngati nge sap te thla a lakpui a? Mizo a ni lo mi? Kan pi leh pute'n tarmit an vuah ngai si lo va, ngati nge he pa hian tarmit a vuah a? Ngaihdam dil rawh se. Ngati mge a jersey hak te khi awmzia? Adidas kutchhuak em ni? Mizo a ni lo mi ngati nge Adidas kutchhuak te a hak? Ngaihdam dil rawh se, Adidas kutchhuak ha lotute zawng zawng chungah. Hmanlaiin jeans kekawr an ha ngai lo, ngati nge hrenpereng a kaih mai loh? Ngaihdam dil rang rawh se.' tih chu.



Rin aiin mi'n an lo ngai thutak hlawm a! He thu ziah lai thleng mi 521-in like-in comment pawh 182 a awm tawh. Fiamthu a ni tih hre miah lova lo ngai thutak em em, a post-tu min sawt vak vak an awm a; chutih laia fiamthu a ni tih hre tho si, hetiang lampang chi post hrim hrim nin avanga comment an awm bawk a. Thenkhat chu fiamthu a nihna anga lo hlimpui an ni a, a then erawh chuan 'post awmze nei tak'-ah min lo chhuahsak bawk a. Comment lem nuam lo tak tak awm mah se, mahnia chhiarin ka hlimpui hle!

Comment thenkhat, uangthuanga post a ni tih man lo fe fe-te han dah ila, tlemte chu! 

Ma Muante post mawl tak niin k hria, A kawr hak leh a tarmit vuah te khi hmanlai ata tawha an tih thin angin anihna ang tur takin a hmang. Tarmit khi a zahmawh khuh nan a hmangin fashion takin a awm loh khi. a nihna diktakah a hmang zawk

Remruata R Yenloc I fiamthu a mi...?mi thil tih i lak kawi dan hi a atthlak lutuk,I THIL TIH HI KUMTLING TAWH,MI PANGAI TIH A TAN CHUAN "atna chikhat " A NI.

Lersia Tupa Achhana Chawngthu chhu khuh kal zel kha a niang

Mapuia Chhakchhuak thil re re hi hnialhrat bawp lawkah lak loh tur, khing khi kan hnam rohlu, kan hum halh tlat tur thil te nen a dang lam daih, chaw raw lo lutuk

Lalrohlu Infimate Sawsel tur in va hre hlawm reu ee... mi inchei dan,mi khawsak zia a buai2 lo te ang uu... post tupa poh khi athil khel aho... Sapa khian alak pui zawk po ni thei a.. ho teh tuh.

Castiel Winchester Khi pa khian kn mizo thl eng mah rwi sak a ny lo . . . . Hman hlut na rilru i pu lo hle mai . .

Caeser Caeser I thu post hi ka mawl zual zel dawn tihna mi.pawl engzat nge i chhiar.

Colney Stacy Comedian search atel vang hian milar in nilo,, intih lar tum vanga thu ziah teh vak lam anilo,, Govt Aizawl collage ah chauh ikal,, Thangchhuahkawr Chhu khuh nan a hman kan sawisel tih elhsen nan a hetiang iti hi thildik niin ihria em.. Kha Thangchhuah puan, Chhu khuh nan a hman kha ibialnu emaw ilam hnai anih vang nge? Hetiang zawnga deusawh zawnga irawh tih,,, Commedian search atel hian thil engkim in hre lo,, Govt. Aizawl Collage a Mizo subject lak vang khan Mizo ber ini lo.. I ţawngtheih avang khan Mizo rilru ihneh vek kher lo..

Aruati Hrahsel Khupchawng Ka gyh ve danah cuan,,tarmit vuah te h cu mit that loh na vag anya,mamwhna vag ani,,cuan 21st cnt.ah hyn kn thwmhnw hak te pwh a daglam co ve jel tr ani,,headhunter tia swi thn kn nh qa kn nh twh loh avagin tunly thuamhnw hak te cu kan phu ve alwm,,hei h cgkan na lh hmaswn na ani.,

Octobertwentyeight Man Utd comedian search a hmuilian zet kha a ni maw

Kholhring Melody thla chu lakpui ngey my mase ruak keng kung in an a awm velo a christian kan nih na mualpho thlak khopin ati lang ve lo ..tin hetyag nen teh khin chi poh ania mi tret trut my


Heng hi ka han thur chhuahte a ni a, a ngai ngaiin ka copy a ni. Comment hlimawm tak tak a tam hle a, chutih laiin comment thenkhat hi chu a ngeiawm ve duh phian! Thil huatthlala phei chu a ni lo nain. 'Intihlar tum vanga thu ziak' anga min puh phei khi chu thin a dek zar. Sawi belh loh theih a ni lo.


Kum 2005 atangin Vanglaini chanchinbu-ah article ka ziak tan a, hemi kum atangin chanchinbu-a thuziak ka chîng tan, tun thleng hian ka la chîng zui zel a. Ka tuina avang liau liauvin thu ka ziak thin a, Mizoram University-a MA (Mizo) ka chhuah hnuah pawh hna thawh tur dang pawh zawng eih lovin thuziak lamah ka inhmang tawp a; chanchinbu te kan enkawl zui a. Ka thuziak hi intihlar nana ziak ka nih lohzia chu, mahni hming diktak pawh hmang lova hming lem (pen name) ka hmang mai mai a ni. Hetiang a nih laiin mi thenkhat thinlungah 'intihlar tum vanga thuziak' tih lam a lo awm ang tih ngaihna ka hre lo reng reng. A mak ka ti viau a, huat chi-ah phei chuan ka ngai lem hlei law. Comedian Search tih vel phei chu, kum 8 kal ta daih (2008) thil mah ni se, eng emaw a awm hleka mite min deusawhna hmanrua a ni hrim hrim a, ngaiah ka neih tawh zawk a ni.

He thil hian facebook hi mi vengva leh chhah tak tak, mize chi hrang hrang awm khawmna a ni tih a tichiang viau a, hringnun zirlai tha tak a ni zel mai. Eng pawh ni se, mi uang tak ka nih avangin duhtawka thian fiam ngam tur ka nei hi vannei ka inti hle a, sim mai a la har ang!

04 March 2016

10%

Zaa sawm (10%) hi a lo țangkai a ni. I hauh hram hram ang u.

1. I thluak 10% a awm loh chuan ruang bulah i țhu nui ver ver reng ang.
2. I hnar 10% a awm loh chuan thawk hawm hawm bak tih theih i nei lo.
3. I kawppuiin a taksaa 10% a ui beh tlat chuan thawh fuh tûk reng i nei lo vang.
4. I phone contact list-a phone number 10% a bo chuan insawifiahna tur i ngah phah viau ang.
5. I kekawrte 10% a pawp chuan nuam tuam tlâk a ni lo.
6. I ri hriatna 10% i hloh chuan 'scholarship i dawng dawn' an tih che pawhin 'la ei lo deuh' i ti nulh nulh țhin ang.
7. I wallet/purse-a thil awm 10% a bo vaih chuan a hmuh lêt leh nan a chhunga awm 25% i sêng hreh lo ang.
8. I hâ 10% a bal chuan i țhen kaw pawm reng mai ang.
9. I san zawng 10% a tawi thut chuan mi zak hnuaiah i vei deuh chhen ang.
10. I something kha a hma aia 10%-a a têt vaih chuan a durh pep a ni mai, durh pep.

Nileng hun 100% hmang thei tura kan nunna zuahtu Pathian chungah lawmthu i sawi țhin ang u.

March ni 4, 2015-a kut hlei thil tih mai mai.