Fu tui zuar nula

Zin veivakin Tuirial ka paltlang fo va, fu tui tui tak mai zuar nula ka tawng fo mai. Dawr loh inthlahrunawm khawpin min an chiauau thiam a, heti em ema mahni hna tlin, mahni hna thiam hi kan khawpui chhung sumdawngte-ah emaw, dawr nghakah emaw an tam em em bik awm lo mang e aw, ka ti rum rum thin.

He kan khawvel hi a chhunga cheng mihringte avangin hmun hrehawmah a chang tawh a, retheite tan hlei hlei anchhia a tling. Chutiang khawvela cheng, misual tam tak zingah chuan, kalna apianga ngaihsan tur zawng, ngaihsan tlak ka dap thin a ni. Tuiriala fu tui zuarte khu chawlh remchan a awm chuan an eizawnna chungchang zawh ka chîng a, mi taima, thawkrim leh thawhchhuah neia intodelhte ka ngaihsan avangin anmahni pawh khu ka ngaisang thin hle.

Tunah hian fu tui zuara eizawng, fu tui zawrhna dawr hi 9 a awm mek a, zing dar 8 atanga zan dar 10 thleng te an inhawng tlangpui a, zan lama an inkhar hun chu an peih hun hun a ni deuh mai a ni awm e. Ni khatah hian cheng 2000-3000 an hlawh tlangpui a, an inhralh that deuh changin cheng 4000-5000 hlawh tum te pawh an nei thin. Nipuiah chuan an hralh tha thei fu a, thlasikah pawh an hralh chhe chuang lo. Fu hi Tuirial ami vek leiin tlawn khat hi cheng 10-in an lei tlangpui a, an hlawh hi a nêp lo viau niin a lang.

A tlangpuiin, a nghaktu hi nula an ni fur a, an hmel pawh a tha hlawm viau! Lirthei tlan vel a tam avangin a luck pawh an luck cher cher hle a ni. A bikin sumo lo tlan an hmuh hi chuan driver an hminga kovin an pan nghal vat thin. Fu tui zuar nula pakhat chu kum 18 tling awrh a ni a, sikul a bansan hnuah fu tui a zuar a ni. An fu tui zawrhna hnungah thingpui dawr an nei nghal a; ka zu kal lai chuan unau hmeichhia pathum awm zingah a naupang ber chuan fu tui a zuar a, a ute'n thingpui dawr an enkawl bawk a. Chutah chuan ei siamin, zanriah an kilho va, zanah an tlang nghal thin ni awm tak a ni. An taimakna chu ka ngaisang hle.

Sumdawng nih chuan sumo driver thiana siam tam a pawimawh hlein ka ring. Nitin lirthei an khalh a, passenger emaw zat an phur a. Chaw eina hotel a ni emaw, thingpui dawr a ni emaw, fu tui zawrhna a ni emaw, driver-in chawlh duhna bik a neih chuan passenger-te pawhin kan hnial lo tlangpui. Driver-in fu tui zuartu duhsak bik a neih chuan an zawrhna dawr hmaah an ding a, passenger dangte pawhin kan dawr leh nge nge thin. Chutiang mai mai chu a ni, business tricks chu!

Thil te neuh neuh nia lang hi mi'n eizawn nan an lo hmang zel A thupuiah 'Fu tui zuar nula' ka'n vuah tak nain, thil dang han ziah belh zel ila. Sikulpuikawn thlang lam bus stand bula alu papawr zuartu hian nitin alu bag khat chu an hralh ziah thu min hrilh. Alu tui neia kan leh papawr hi sarangah an dah a, hmarcha an telh chawp bawk a, chu chu cheng 10 man leh cheng 20 manin an siam mai a. An hralh thei em em mai a ni. A bikin sikul naupangin an dawr nasa hle. A kawt awl remchang laiah dawr tê an siam pah bawk a ni. Alu papawr zuara eizawng hi Aizawlah engzat tak awm ang maw.

Zingkara hma taka tho thin chuan, kawtthler hmun rem deuha thingpui leh chhang vel siam hi in hmu thin ang. Mizo Hnam Run piahah sawn insi chatin chutianga thingpui chhang ei leh inna hmun hnih a awm a, anni pawh zingkarah chuan rak ve cher cher tak an ni. Khua a var hma leh hma loh azirin zinga an awm tan hun a inang lo va, dar 4:00-4:30am vel a ni tlangpui awm e. Zing dar 8 thlengin an awm a, chhang an nuai chawp a, an kang chawp a, atta kan chawp phei chu tui tak a ni. Zing khatah cheng 2000-3000 vel an hlawh chhuak thin. Chutiang chu Aizawlah hmun tam takah a awm a; kum 2009 velah pawh Zarkawtah chutiang chu an awm tawh a, zingkara chanchinbu tichhuak tura Treasury Square kan kalna kawng a nih avangin thil eiin kan chawl fo mai.

Zorama ngaihsan hlawhte hi mi vantlang chunglam an ni fur a, Zoramah chauh pawh a ni lo vang. Hna hniam leh hna zahawm lutuk lo nia mite'n an ngaih thawktute hian a Zoram pum huap anga ngaihsan leh hriatreng an hlawh khât khawp. Infiamna leh zirna lama thei bik leh Zoram tihmingthatu te, hna pawimawh thawhna kawngah te, thiamna leh hriatna lama mi bik te, entertainment khawvela mi lar leh hmingtha te, ram hruaitu leh Pathian rawngbawltu te, ziakmi leh hla phuah thiam te, sumdawng hlawhtling te, kawng hrang hranga midangte aia sang deuhte hian mipui nawlpui ngaihsan an hlawh thin. Kei erawh chuan, mi tam takin an aia sanga an en ngai loh, hna zahawm tia zahpui lo taka an sawi chiam chiam ngai loh thawktu taima, eizawn nana hmang te hi ka ngaisang reng ang.

Miin taima taka hna an thawh chuan, an ei khawp hi chu an hmuchhuak ve zel. Kan biak Pathian hian thawkrimte hi a lo hre khawp a, mi thatchhiate ngawt ai chuan malsawmna pawh a ui lo deuh niin a lang.

Computer...Oh My Computer!

Thuziahna tur ka duh avangin typewriter hi ka awt thei em em a, mahse, ka awt tluan a ni. Computer ka awt leh em em a, mahse, ka awt ral leh thin. Kum a vei a, hun a inher a, thil a lo danglam chho ta.

Kum 2004-a pawl 8 kan zir khan, kan sikul, Govt. Vanbawng High School-a kan zirtirtu, Sir Martin-a (Sir Rela kan ti bawk) hovin sikul computer chu kan khawih thin a, tum hnih tum thum emaw chauh a ni ang. Chu chu ka computer khawih vawi khatna ni tain ka hria. Mouse te kha ka'n hmang thiam lo laileng khawp a! Games ka khel a, keimah zawk ka eu vak vak zel. A kum leh, 2005 khan pawl 9 chu Govt. High School, Durtlang-ah ka zir a. Chutah chuan IT practical-ah kan khawih leh thin bawk. Chutah chuan RAM, ROM etc tih vel a theory-in kan zir a, a takin mumal deuh zawkin a hman dan te kan zir tawh a ni. Chuta tang chuan computer chu ka khawih chho ve ta zeuh zeuh.

Ka tan chuan 2009 kha kum pawimawh tak a ni. Ka lehkhabu hmasa ber 'Hmangaihna Tuboh' ka tihchhuah kum a ni a, he lehkhabu vang hian computer typing leh pagemaker hrim hrim ka hman theih phah. Tpa (Laltanpuia Chhangte, lehkhabu chhuah thin) nen kan inhmelhriat a. Ramhlun Venglai-a a awm lai a ni a, magazine hrang hrang a tichhuak thin. Chutih lai chuan Comedy Fiamthu Magazine hi thla tin a tichhuak a, chutah chuan thu leh hla ka va thawh thin a. Ka intat lut zel a, a tirah cheng 500 min pe a; kum a thar a, magazine dang 'Lungdi' leh 'Zunleng' te kan tichhuak zel a, cheng 3000  min hlawhtir a; ka ei khawp chu ka thawk chhuak ve tawk tawk a ni.

Ani computer atangin ania pagemaker khawih chu ka thiam tan zawk ni. Ka 'Hmangaihna Tuboh chu amah Pu TPA chuan min chhuah (publish)-sak dawn a, a computer-ah kan chhu lut a, ka pagemaker khawih hmasak berah chuan darkar khatah paragraph khat ka chhu zo tawk. Keyboard-ah ka chhut tur hawrawp ka zawng vang vang phawt a, ka chhu leh chhat a! Ka lu a na thei hle. Chu chu ka bul tanna a ni ber.  Ka la hriat reng chu, Pu TPA leh tuna AMC Councillor ni ta Pu Tlanzova Khiangte te hi magazine tichhuak ho thin an ni a, Pu TPA ina a room-ah computer pahnih a inhûng a, ani'n lehlamah a hna khawihin a chhu a, keiin lehlamah ka hna ka chhu bawk a. A châng chuan ka riah chilh thin.

Chutih lai chu Ramhlun North Basic Mual mawnga ka awm lai a ni a, ka chenna piah lawka awm U LMA (Lianmawia) computer tharah ka thawnthu chu kan chhu lut thin bawk. Ka thawnthu 'Hmangaihna Tuboh' chu 2007-2008 chhunga lehkhapuana ka ziah ve liau liau a ni a, chu chu ka awm loh changin amahin a lo chhu lut malh malh a, kei ka hman changin ka va kal ve leh thin bawk. U LMA kha ka lo tibuai nasa thin hle tih tun hnuah hian ka hre chiang chho ta viau a, lehkhabu a chhuah hnuah lah khan bu khat ka pe ve a, chu zawng chu a hlawh a ni mai a, tun hnu hian a chungah ka lawm ngawt mai.

Pu TPA kha pagemaker mai ni lovin, photoshop pawh thiam tak mai a ni a, khatih lai khan photoshop thiam tumna ka lo nei lo em a, ka ui hnuhnawh leh ta ngawt mai. Magazine a ni emaw, lehkhabu pangngai kawm (cover) a ni emaw, Pu TPA kutchhuak chu ka hre chhat chhat thei. Treasury Square DC Court Road-ah sawn office kan nei a, 2010 chho velah khan 'Dream World Media' kan ti a, hna kan thawk nasa thin hle. Chu lam chu sawi thui rih lo mai ila.

Kum 2009 khan college ka lut tan a, Govt. Aizawl College-ah Mizo ka honours a ni. Vanduaithlak takin 1st year B.A kha 2010-a kan exam khan ka fail hlauh mai a, kum 2010-11 chhung khan bei nawn lehin class erawh ka kal lo. Chumi kum, 2011 kum tir tê-ah chuan Pu Mapuia (H. Rotluanga of Zephyr Drama Club) nen FTH Fiamthu Huang Magazine kan tichhuak a, Editor-ah ka tang a. Kum khat pumhlum zen zawn chu kan tichhuak a, 2012-ah 3rd year B.A ka zir leh tak avangin bansanin, kan titawp leh ta a ni.

Mapuia hnuaia hna ka thawh lai khan video editing ka khawih ngai lo nain, eng emaw chen chu ka hriat phah a, Photoshop pawh chu, chanchinbu ka kuta a'n tlak tak vekah chuan loh theih lohvin ka khawih chho va, a tulah chuan ka khawih thiam ve saih saih chauh va. Pagemaker erawh hi chu, mahni tawkah thiam ka inti viau tawh. Chung ka experience neihna, eizawnna ka neih vena, hna ka lo thawh venate avanga tun hun (engmah phei zawng ka la ni chuang law) thleng thei ka nih ka inhre chiang ta viau mai.

Hmun hrang hranga hna ka thawh kual chhung hian computer ka awhnaa zual telh telh a, ka nei thei si lo. Sum erawh ka theih ang angin ka khawl a. Kum 2010 ni tain ka hria, 'Zoram Khawvar' tlangaupui thintu Pu Lianhmingthanga (Zoram Genesis), Dinthar hian a computer hman tawh loh, a hnung lawk bár mai chu a siam theih dan a awm takin tiin min pe a, siam theih erawh a ni lo nain min ngaihsak tih ka hriat avangin ka lawm takzet a ni. Kum 2011 khan GAC SU leader hlui, Chhantea computer hlui chu cheng 6000 (nge Rs. 4000 zawk, ka chiang ta lo) chu ka neih chhun chhunin ka lei a. Ka 'Mi Anglo Thian'-te chuan an in, Dinthar atangin zanah min put hawpui a, ka phurzia kha aw... Chak vak lo mah se, ka hmang tangkai hle. Chutah chuan magazine kan lo tihchhuah tawh zawng zawng leh ka lehkhabu tihchhuahte soft copy-in ka dahtha thlap a ni.

Nimahsela, ka hard disk a'n chhiat takah chuan ka document neih, ka thu leh hla neihte chu a bo ta vek mai a. Recover kan tum ngial pawhin kan hlawhchham a, thianpa Mapuia (Mapuia Renthlei, lehkhabu ziaktu) hian hawnin a computer-ah a vuah vel chhin nain, kan hlawhchham hlen ta a. Kha hard disk kha la kawl tak maw. A chhunga ka thil pawimawh awm zawng zawngte kha ka ui takzet. Kha computer hmang khan lehkhabu pahnih - 'Nun Tihlimtu' (bu hmasa zawk) leh 'Chhum dum kara chhemdam thli' chu ka puitlin ve hman bawk.

Kum 2012-ah vanneihthlak takin GAC SU Magazine Editor-ah ka tling ve hlauh va. SU leader ka thiante pahnih - Tharpuia (Lalnunthara, Secretary, Social & Culture Deptt) leh Thangbawiha (Zataithanga, Secretary, Debating & Literary Deptt) te chuan an department intihsiaknaa lawmman atan ka lehkhabu 'Hmangaihna Tuboh' chu bu 50 ve vein min leisak a (ka theihnghilh ngai tawh lo vang). Chumi kum, 2012 ka scholarship dawn leh computer lei nana ka sum lo khawl ve tang tangte nen belhkhawmin tuna ka laptop hman lai hi 2013 khan Chanmari-a GI Infotech atangin ka lei ta a ni.

Tuna ka laptop hman lai atang hian lehkhabu 4 chu ka puitlin ve tawh. Hnathawh nan, eizawn nana ka hman liau liau a ni a, a tawng tawh viau nachungin ka tan chuan a hlu takzet. Kum 2015-a M.A ka han zir chhuah takah khan, tun hmaa chanchinbu kan lo buaipui thin bawk nen, lunghlui a leng a. Khatih laia MSU hruaitu (tuna MNYF Hqrs Vice President ni ta) Pu Lalremruata Chhangte (Maremruata) leh MA (Mizo) ka zirpui Fela Ngente leh MA ka zirpui tho Kimi Colney te nen 'Zoram Today' kan tichhuak a, thla khat vawi hnih tichhuakin Editor-ah ka awm nghe nghe. Nimahsela, hloh char char chuan kal reng ngaihna awm chai si lo, 2016 khan kan titawp leh ta ringawt mai a ni.

Thuziak lama ka tui avang te, lehkhabu ka tihchhuah ve thin avang te, chanchinbu kan lo tihchhuah ve thin avang tein lehkhabu chhutna khawl, offset press neih ka châk em em thin a, ka tan tihngaihna a awm ngang si lo. Pu Maremruata chu offset press neih a hlawkzia sawipuiin nei turin thu ka ràwn a, ani'n loan lain 2016 khan a nei ta a. Tunah hian intichangtlung chho zelin 'Daifim Press' tiin Vaivakawn-ah an inbun a. Hna a neiha ka khawih theih tur chi a awm chuan keiin inah ka lo khawih a, chutiang chuan sum ka mamawh ang te ka lalut ve hram hram a.

Kum 2016 atang phei kha chuan ani nena tangkawpin college hrang hrang magazine hi kan khawihsak a; ka han sawi mai theihah chuan Govt. Mamit College, Govt. Hnahthial College, Govt. Saitual College leh Women's Polytechnic, Aizawl te annual magazine kan khawihsak a. Nikum, 2017 khan ani nen thawkdun lehin Govt. Hrangbana College, Govt. Aizawl North College, Govt. Saitual College leh Women's Polytechnic magazine te kan khawih leh a. Tin, magazine vel siam thin tho U LKA, @Diginet nen pawh thawk dunin ani nen hian Govt, Aizawl College, Govt. T. Romana College, Govt. Serchhip College magazine te kan khawih a, ani'n a mimalin Pachhunga University College magazine a siamsak bawk.

Ka sawi hmaih loh tur chu, flex printing khawih thin, Pa Thara (Pu Lalnunthara Sailo) hian a dawr Gemini Enterprise-a thawk turin 2016 December thla khan U LKA kaltlangin min sawm a, tichuan, Sikulpuikawna a dawr pakhatah chuan computer operator niin ka thawk tan a (ka hna ber chu flex print tur, banner design hna a ni deuh ber), nikum, 2017 April thlaa MNF party-a kan luh thleng khan ka thawk a ni. Party-a ka luh tak avangin loh theih lohvin ka bansan ta a, a hna erawh ka tui hle. U LKA hi college magazine editor ka nih laia kan college magazine ka khawihtir a ni a, chuta tanga inhre tan niin 2016 December thla atanga hna thawk dun ta kan ni.

Magazine khawih han tih khan, a chhung thu remfel te, a kawm leh colour paper siam leh edit a ni ber. Chu chu phaiah kan thawn (or kalpui) a, a hard copy-in editor-te hnenah kan thlen leh thin. Hei bakah, pawl leh khaw thenkhat souvenir/annual magazine te, mimal lehkhabu edit hna te ka thawk a, thian thenkhat lehkhabu kawm te ka siamsak bawk thin. Hei hi insawitheihna lam hawi a ni hran lo va, ka laptop ka hman tangkai dan a nizawk. Kum 5 lai rim taka ka hman tawh, he ka laptop hi tunah chuan ka eizawnna ber a ni rih e. Vawi khat mah ka la siamtir lo va, vawi khat erawh windows ka load thattir tawh. A keyboard-ah hman hleih theih loh a awm nual tawh nghe nghe a, tunah chuan chhan ho tê tê avangin min peih lohsan ta zeuh zeuh a, electric, aw current vanlalcurrent a awm loh phei chuan, amahin thâwk ngaihna a hre ta lo.

Hriselna tha min petu Pathian hnenah lawmthu ka sawi a ni. Hmana hun harsa tak ka tawn kha ka nuna thil chhinchhiahtlak ber a lo ni zawk a, ka tun hun dintu a lo ni.

Alfred Lord Tennyson-a chungchang tlem

Kum 1836 May thla khan Charles-a leh Louisa Sellwood chu England-a khaw te reuh te Lincolnshire-ah an innei a. He inneihnaah hian Charles-a unaupa Alfred, Lord Tennyson (1809–1892) leh Charles-a nupui neih tak Louisa Sellwood unaunu Emily te chu intawngin hmangaihnaah an uai zo ta! Kum hnih kum thum vel lai chu inzui mah se, Emily-i pa chuan Tennyson chu makpa atan a duh thei tlat lo. Kum 1840 chhovah phei chuan inhmuh takngial pawh a phalsak lo. A chhan chu — zu a in thin vang leh meizial a zuk nasat vang te, rinna lamah a thiangzau (liberal) vang te a ni. Tichuan, heti zawng hian ka ngaihtuah a: zuk leh hmuam leh ruihtheihthil tih loh te, kohhrana theihtawka inhman te hi luck-na a va tling em, tiin!

Nimahsela, Alfred, Lord Tennyson leh Emily Sarah (1813-1896) te hi kum 1950 khan an innei ta tho a ni. Hetih lai hian a changtupa zawk hi kum 41 a ni a, a changtunu Emily hi kum 37 a ni. Chuta tanga ka ngaihtuahnaa lo lut chu, mi an inhmangaih phawt chuan chhungte atangin harsatna awm mah se, hmangaihnain a tuahrem tho tho! Kum te chu tam mah se, kumin hmangaihna a bar lo! An pahnih hian fa thum an nei a, Alfred-an a ngaihsan leh ngaihhlut em em, a thianpa hming chawiin a fa upa ber hmingah Hallam Tennyson a sa nghe nghe.

Alfred, Lord Tennyson hi Victorian Age hun laia English poet lar leh sulsutu ber nia sawi a ni. Kum 18 mi lek a nih lai, 1827 khan a unaute pahnih Frederick leh Charles te nena an poetry dahkhawmna 'Poems by Two Brothers' tih chu an tichhuak a, heta a zatve aia tam mah chu amah Alfred-a poetry a ni awm e. Chu mai a ni lo, kum 14-16 a nih lai vela a thu leh hla ziah hrang hrangte chu 'The Devil and the Lady' tiin a tupa Charles Tennyson chuan 1930 khan a tichhuak ta bawk.

A kum zat ka’n tarlan deuh thlap thlap chhan pawh, thu leh hla lama khawvelin a hriat larte hi an kut a lo va hlei hma em! An lo va inup lo em, tih lam daih a ni! Sawi zau erawh ka tum lo. Kum 24 a nih lai, 1933-a a poem phuah ’Ulysses’ pawhin heng laiah ngaihhlut a hlawh ve a ni ang, khawii maw laiah chuan kan zir tawh nghe nghe kha.

A fa u ber hming a sak chhan, a thianpa Arthur Henry Hallam (1811-1833) pawh hian khawvelah kum 20 chauh hun a hmang hman. He a tleirawl thian nen hian 1827 khan an intawng a, a thian tha ber nia sawi a ni. Kum 1833-a a thihsan pawh khan a tuar na hle a, a hriatreng nan ’In Memorium’ chu 1849 khan a phuah nghe nghe.

Alfred hian 1830 khan ’Poems, Chiefly Lyrical’ tih chu a tichhuak a; hemi fakna thuziak hi Hallam hian 1931 khan ’Englishman’s Magazine’-ah a tichhuak a ni. Hallam hi Alfred-a unaunu Emily nen inhmangaih hle mah se, Alfred-a pa George Clayton Tennyson chuan makpa atan a lo iai ve leh tumhrang a! Kum 1831-ah a pa chu a thi a, a thih hnu 1832-ah Emily leh Hallam chu sawi remin an inhual ta a. Nimahsela, an inneih hma 1933-ah Vienna-a a zin laiin Hallam hi a thi ta thut a, a thianpa thih hi Alfred hian a tuar nasa a. Chutia a thianpa thihna avanga lungngaihna chhumpuiin a hual mup mup lai chuan poetry a phuah ta chur chur a — ’The Two Voices’ tih te, kan tarlan tak ’Ulysses’ te, ’St. Simeon Stylites’ te a phuah a ni.

Chuta ka rilrua lo lang leh ta chu, inthianthatna hi a ni. Alfred leh Hallam inkawm ngeih dan kan hre ta a, Alfred-a nau Emily leh Hallam an inhmangaih chhoh dan atangin thian inhnimhnai tak chu an nih a rinawm sa hrim hrim a. A pa a thih hnu phei chuan, an pahniha an inneih/inhual theih nan Alfred-a hian a thawhhlawk hle pawh ka ring. A thianpa thih avanga poetry eng emaw zat a phuah te, a nau leh a thanpa inhmangaih chho te, a thianpa hming chawia a fa hmuh hmasak ber hming a sa mai te hian thian hlutna a hrilin a hrilhfiah mang e ka ti.

Heti hian ka inngaihtuah a, nupui a chhia a tha kan hmu ve te a nih ngai chuan (thiante unaunu remchang an lo awm ve hlauh te a nih chuan) thian (moneitu thian)-ah tu ber nge ka hman ang tih theih tur khawpa kawmngeih thian ka nei nual; chutih rual chuan, tun thleng (heti zat kum ka nih tawh hnu pawh) moneitu thiana vawi khat mah ka la tang lo hian ngaihtuah a tithui angreng hle!

Youtube atangin kum 6 mi hausa tawntaw chu

Mizo naupang kum 3/4 mi lek pawhin youtube an khawih zat zat tawh a, khawvel naupang dangte pawh an lo ni chek a ni ang, March ni 1, 2015-a siam youtube channel Ryan ToysReview atangin kum 6 mi leka upa Ryan chuan dollar maktaduai 11 ngawt a hlawh chhuak tawh! Chu chu tuna India pawisaa a hlutna chu Rs. 69,85,97,900 vel a ni dah mai. 

 

Youtube atanga mi hausa tawntaw kum 6 mi Ryan-a chu

  

Forbes Magazine-in a tarlan danin, June ni 1, 2016-June 1, 2017 inkara Ryan-a sum lakluh hi USD mtd 11 a ni a, youtube atanga sum lalut tam 8-naah a thu vung mai. He thla 12 chhung hian a channel view hi tluklehdingawn 8 lai a tling. Youtube-a sum lalut tam 10-te sum lakluh zat hi nikum chhung khan USD 127 a ni a, kum hmasa lam lakluh atangin 80%-in ngawtin a pung a ni.

 

Kum hnih  kal ta khan Ryan-a nu leh pate chuan an fapa tan youtube channel an siamsak a, an video hmasa ber, Lego Duplo train set nena a infiam lai, minute 15-a sei chu channel an siam tirh, March thla khan upload mah se, chu eng ruai a ni lo. A video pahnihnaah, a toys nena infiam lai chu an dah a. Chu chu internet-ah viral-in a channel a lo hlawhtling chho ta a, a chhungte chu mi hausaah a chhuah ta mai a ni. January, 2016 a nih meuh chuan subscriber maktaduai 1 a nei tling der tawh a; nikum June thla khan kar 40 chhung zet chu  Ryan ToysReview channel hi US-a youtube channel en hlawh ber a nih thu TubeFilter chuan an tarlang. Ryan-a channel hi naupang kum 3 atanga kum 7 inkar hian an en nasa ber a, mahse, chu chuan USD mtd 11 a hlawhtir tlat thung.

The Washington Post-in Ryan-a hlawhtlin chhan a tarlan pakhat chu, a video thupui-a hawrawppuia 'SURPRISE' tih a dah hi a ni. A video thupui thenkhat chu 'GIANT EGG SURPRISE' 'HUGE EGGS SURPRISE TOYS CHALLENGE'  'BALLOON POP SURPRISE'  'SURPRISE TOYS Giant Ball Pit Challenge' te hi a ni. Ryan-a video hi kartawpah siamin, sikul a kal hlanin a nu leh paten edit-in an upload thin a. A video view-in maktaduai a tlin chuan Ryan-a a lawm thin hle thu te, toys dawr leh bazar an chhuahnaah miten an lo hriat em em thin thu te chu Ryan-a nu (a hming tarlan a ni lo)-in a sawi bawk.

Ryan-a hlawhtlinnaah hian youtuber-te tan zir tur pawimawh tak a awm thei awm e, Youtube hi 2005 vel atanga intan a ni a, kum 10 hnu 2015-ah Ryan hian channel nei tanin a hausakpui thei. Youtube-ah kum 2 vel bak hun a la hmang lo nain mi hausa tawntawah a chhuak der tawh a ni. Thil pawimawh tak pakhat leh chu, youtube video pakhat viral hian hlawhtlinna a thlen thei tih a tichiang hle bawk. Ryan-a pawh a hi a video pahnihna, toys 100 vel nena a infiamna video 100+ cars toys GIANT EGG SURPRISE OPENING Disney Pixar Lightning McQueen, minute 7:25 leka sei hi a viral a, chu chuan a channel vawrh larin mi hausa tawntaw a nihtir a ni. He video hi July ni 1, 2015-ah upload a ni a, he thu buatsaih lai hian he video view hi 818,991,994 zet a ni tawh.

Tunah hian Ryan-a channel hian subscriber 1,07,93,426 zet nei tawhin channel view 17,83,62,20,689 a nei tawh a ni. Khawvel huapa naupang hausate hi filmstar leh zaithiam chauh an ni ta lo! Generation thar a inher mek zel e.

The Ration Card kum 10 kan tling ta!

Kum 2007 December ni 31 zan khan Vanbawng khuaa Presbyterian Kohhran Tleirawl Inkhawmte chuan, kumhlui thlah zan chu Kohhran Hall-ah tlaivarin kan hmang a, chutah chuan kan thianzaho chu 'The Ration Card' tih hming invuahin kan zai a, kan uang hle. Hei hi kan 'The Ration Card' lo pian chhuah dan chu a ni deuh ber awm e.

Chuta programme kan hman hnu chuan Pu Lalchungnunga chu ngamtlak takin, chaw ei siam turin kan tur kan tur a. Ani chuan, "Biak Ina in zai ngam phawt chuan chaw ei ka siam ang," a ti a. Tichuan, January ni 2, 2008, Nilaini zan inkhawmah kan thianho chuan 'Kawng zim zawh tan ka lo ni' tih kha kan sa a. A tuk, January ni 3, 2008, Ningani tlaiah chuan Pu Lalchungnunga chu a lo intiam ang ngeiin, a inah arsa kan kilho ta a ni. Hemi tlai hian kan hlim khawp a, thla kan laho nasa hle. Minute bu kan lei a, kan siam nghal a.

Chu minute bu-ah chuan member 9 ziah luh a ni a, chungte chu:

Members:

1. T.S. Khupchong

2. Zodinmawia

3. K. Lalruatfela

4. T. Lalruatfela

5. Malsawmtluanga

6. P.C. Vanramchhuanga

7.  Vanlalhruaia

8. Lallawmtluanga

Managers:

1. Pu Lalchungnunga

2. Pu H.T. Sona

3. Tv. Lalrohlua 

Kan thiltum (motto) hi 'Pathian fak leh mite tana malsawmna nih' a ni a, kan thuvawn chu 'I awmdan tur chu Lalpa chungah nghat la, Amah chu ring la, Aman a ti vek ang. -Sam 37:6) hi a ni. A tir lama kan programme neih tlemte bak chu minute buah kan ziak lut ta lo va, a uiawmin a pawi hle.

 

The Ration Card logo, thianho duh dana ka siam.

 

 Kan thianho hi kan pung ve zel a. Kohhran bil ang pawha kal lovin, keini thian inkawmho hi 'The Ration Card' member chu kan ni ta zel a. Krismas leh Kumthar inkar zan remchangah carol service te neiin, kan sum hmuhte midangte tan kan sem chhuak a. Kumhlui thlah zana tleirawlin programme kan hman apiangin 'eng emaw tak' kan ti ziah bawk, a hlimawm zawng hlirin. Tun hnaiah sports lamah te chhuakin, Vanbawnga volleyball tournament-ah telin kan champion fo va, a vawi khatna atan Vanbawng Games & Sports Association-in December ni 27-29, 2017 chhunga football tournament-ah telin final-ah kan chak zo lo a ni.

 

Football tournament-ah pahnihna kan ni. Dt. 29.12.2017

 

YMA Day hnuhnung ber, 2017 khan kan kum 10 tlin pualin thing tiak 20 chuang zet chu kan phun a, YMA hnenah bawngtuthlawh leh suahdur kan pe bawk. Kan thianho hi naupan tet te atanga inkawm, sikul kalho, a sual a tha tiho thin kan ni. Tunah chuan, kan zingah nupui nei mi pathum an a, fam chang tawh pawh pahnih an awm ta.

 

Nikum, 2017 kum tir atangin kan kum 10 tlin lawmna nei turin kan inbuatsaih a. Member remchangte'n cheng 1000 theuh thawhkhawm tur kan ti a, mi 11 zetin chu kan budget chu kan tlâk a ni. Chu kan thawhkhawm hmangin, t-shirt kan siam a, tournament-ah kan player-te'n an ha a, keinin kan ha bawk a. Granite-ah thuziak kan kertir a, Vanbawng khaw kawtchhuahah kan phun a. December ni 31, 2017 hi Pathianni a nih avangin, a hma ni, December ni 30, 2017, Inrinni khan kan lungphun chu Pu Lalchungnunga, kan manager chuan tlai dar 3 khan a hawng a, a hawnna hun hman zawhah Pi Lianzami inah a lawmna programme tawite kan hmang leh a; tlai lamah uisa bai tui tak mai kan kilho a ni.

 

Pu Lalchungnunga'n lungphun a hawng

 

'Hei leh chen inlungrual taka min hruaitu Lalpa, kan lawm e'

Kan thianho chu kan eikhawm a, kan riak khawm a, thil kan ti khawm a, nula kan rimho va, kan infiamho va, lehkha kan zirho va, kan tapho va, kan uangho va, kan takho va... Thil tam tak kan tihho avangin kan inngaina a; chu chu thian nihna a ni si. Hei lo hi kan la inhmu khawm leh thei kher ang em, kum 10-na, kum 25-na kan hmang thei kher ang em? Kan thianhote midangte tana malsawmna ni thei tura damna leh hriselna min petu, Pathian thu thu a ni e.

 

 

January ni 5, 2014-a kan chaw eikhawm